Azərbaycanın aşağı yaş qrupları üzrə milli komandalarında baş məşqçi təyinatları reallaşıb.
İdman.Biz futbolinfo.az-a istinadla xəbər verir ki, AFFA təyinatları hələ rəsmən açıqlamasa da, dörd yaş qrupunda yığmanın baş məşqçisi müəyyənləşib.
İddialara görə, U-20 və U-21 milli komandaları istisna olmaqla, digər yaş qruplarında baş məşqçi dəyişikliyi baş verib. U-21 yığmasına Rəşad Eyyubov rəhbərlik edəcək. Dünya çempionatına hazırlaşan U-20 millisi isə portuqaliyalı mütəxəssis Rui Jorjeyə həvalə olunub.
Yeni təyinatlara əsasən, U-18 millisinin baş məşqçisinin Mahmud Qurbanov olacağı deyilir.
U-19 yığmasına isə “Şəfa”nı Azərbaycan Premyer Liqasına yüksəltdikdən sonra klubdan ayrılan Elgiz Kərəmli rəhbərlik edəcək.
U-17 millisində Aqil Nəbiyevin yerinə onun əvvəlki köməkçisi Emin Mustafayev baş məşqçi təyin olunacaq.
Bu ilin payızında Azərbaycanda keçiriləcək U-15-lər üzrə dünya çempionatında iştirak edəcək millini isə Aleksandr Qross çalışdıracaq.
U-14 və daha aşağı yaş qrupları üzrə milli komandaların baş məşqçiləri ilə bağlı isə hələ yekun qərar verilməyib. Bildirilir ki, bütün yaş qrupları üzrə məşqçilər müəyyənləşdirildikdən sonra AFFA tərəfindən rəsmi açıqlama veriləcək.
