ABŞ-nin “Çikaqo Fayr” futbol komandasının hücumçusu Robert Levandovski uzun illərdir üzləşmədiyi qol quraqlığı yaşayır.
İdman.Biz xəbər verir ki, Polşa millisinin üzvü MLS-də keçirdiyi son yeddi qarşılaşmada rəqib qapısına yol tapa bilməyib.
37 yaşlı futbolçu sonuncu dəfə sentyabrın 10-da “İnter Mayami” ilə görüşdə fərqlənib. Həmin vaxtdan bəri 572 dəqiqə meydanda olan Levandovski cəmi iki dəfə qapı çərçivəsinə dəqiq zərbə endirib.
Polşa nəşrinin məlumatına görə, hücumçu təxminən 16 ildir belə uğursuz seriya ilə qarşılaşmırdı. O, 2010-cu ildə Almaniyanın “Borussiya” (Dortmund) komandasında çıxış edərkən ardıcıl 10 oyunda qol vura bilməyib.
Levandovskinin hazırkı vəziyyəti Polşa mətbuatında ciddi tənqidlərə səbəb olub. “Przegląd Sportowy” nəşrinin jurnalisti Dariuş Dobek hesab edir ki, futbolçunun adı və keçmiş uğurları onun əsas heyətdəki yerini qorumasında mühüm rol oynayır.
Jurnalistin fikrincə, eyni göstəricilərə malik başqa hücumçu artıq ehtiyat oyunçular skamyasına göndərilərdi.
Bununla belə, “Çikaqo Fayr”ın heyətində Levandovskini əvəz edə biləcək təcrübəli mərkəz hücumçusu yoxdur. Digər nominal forvard, 20 yaşlı Din Bolts hələ əsas komandada debüt etməyib.
Polşalı futbolçunun cari mövsümdəki statistikası da diqqət çəkir. O, MLS-də keçirdiyi 16 oyunda altı qol vurub. Komandanın sabiq hücumçusu Hüqo Kuypers isə ayrılmazdan əvvəl 11 qarşılaşmada 13 dəfə fərqlənib.
Son turda “Atlanta Yunayted” üzərində 3:2 hesablı qələbə qazanan “Çikaqo Fayr”ın heyətində Levandovski yenə qol vura bilməyib. Hücumçu qarşılaşmada qapıya bir dəqiq zərbə belə endirməyib.
Polşa mətbuatı futbolçunun uğursuz çıxışının yalnız qol imkanlarından istifadə edə bilməməsi ilə bağlı olmadığını vurğulayır. Onun meydandakı ümumi fəallığı və komandanın hücum oyununa təsiri də tənqid olunur.
