“Barselona”nın futbolçusu Rafinya sağ budundakı narahatlıqla bağlı cümə günü tibbi müayinədən keçəcək.
İdman.Biz “Diario Sport”a istinadən xəbər verir ki, 29 yaşlı futbolçu Braziliya millisinin Avstraliyada keçirdiyi iki yoldaşlıq oyunundan sonra uzun səyahət edərək Barselonaya qayıdıb.
Rafinya Avstraliya millisinə qarşı ikinci görüşdə sağ budunda narahatlıq hiss etdikdən sonra milli komandanın heyətini vaxtından əvvəl tərk edib.
Futbolçunun zədəsinin dəqiq dərəcəsi müayinədən sonra müəyyənləşəcək. Bununla belə, “Barselona” onun yalnız təxminən 10 günlük bərpa müddəti tələb edən ödemlə (adətən əzələ liflərinin gərilməsi və ya mikroyırtıqları zamanı yaranan yüngül şişkinlikdir ki, bu da qısa müddətli bərpa tələb edir) üzləşdiyinə və ciddi zədə almadığına əmindir.
Rafinya bu mövsüm yüksək performans göstərir. O, keçirdiyi 8 oyunda 14 qol vurub və 3 məhsuldar ötürmə edib.
La Liqada beynəlxalq fasilədən sonra “Barselona” növbəti həftəsonu “Xetafe” ilə qarşılaşacaq.
