“Mançester Siti” futbol klubu İngiltərə Premyer Liqasının maliyyə qaydalarını pozmaqda təqsirli bilinib.
İdman.Biz xəbər verir ki, bu barədə tanınmış insayder Devid Ornşteyn məlumat yayıb. Onun sözlərinə görə, klubun müstəqil komissiyanın qərarından apellyasiya şikayəti verəcəyi gözlənilir.
Jurnalistin məlumatına görə, “Mançester Siti”yə qarşı sanksiyalar hələ təsdiqlənməyib.
Qeyd edək ki, Premyer Liqa 2023-cü ilin fevralında kluba 2009/2010 mövsümündən 2017/2018 mövsümünədək olan dövrü əhatə edən 115 ittiham irəli sürüb. “Şəhərlilər” dəqiq maliyyə məlumatlarını təqdim etməməkdə, oyunçulara və məşqçilərə ödənilən kompensasiyalar barədə yanlış göstəricilər verməkdə, həmçinin Premyer Liqanın mənfəətlilik və dayanıqlılıq qaydalarını pozmaqda ittiham olunublar.
“Mançester Siti” bütün ittihamları ardıcıl olaraq rədd edərək onları yalan adlandırıb. Klub həmçinin Premyer Liqa komissiyasının qərəzsizliyini və onun yurisdiksiyasını mübahisələndirərək məhkəmələrə müraciət edib.
