Azərbaycanda kişi voleybolçular arasında Super Liqanın üçüncü turunun növbəti oyunları bu gün keçiriləcək.
İdman.Biz xəbər verir ki, gün ərzində iki görüş baş tutacaq.
İlk qarşılaşmada “Gənclər” və “Xilasedici” komandaları üz-üzə gələcəklər. Abşeron Olimpiya İdman Kompleksində keçiriləcək oyun saat 17:00-da başlayacaq.
“Gənclər” komandası keçirdiyi hər iki görüşdə məğlub olub və turnir cədvəlində sonuncudur. “Xilasedici” isə iki oyundan 6 xal toplayaraq ikinci pillədədir.
Günün ikinci görüşündə isə “Murov Az Terminal” “Neftçi” ilə qarşılaşacaq. Gənclər və İdman Nazirliyinin Voleybol Mərkəzində təşkil olunacaq matçın startı saat 18:00-a nəzərdə tutulub.
“Murov Az Terminal”ın iki oyundan bir qələbəsi var və 3 xalla üçüncü pillədədir. “Neftçi” isə keçiridiyi hər iki görüşdə məğlub olub.
Turnir cədvəlinə 9 xalla “Ordu” başçılıq edir.
Qeyd edək ki, üçüncü turun ilk görüşü noyabrın 4-də keçirilib. Həmin qarşılaşmada “Ordu” “Azərreyl”i 3:0 (25:19, 25:18, 26:24) hesabı ilə məğlub edərək mövsümdə ardıcıl üçüncü qələbəsini qazanıb.
