Azərbaycan millisinin futbolçu Nəriman Axundzadəni təmsil edən “Pinnacle Talent Management” şirkəti oyunçunun ABŞ-nin “Kolambus Kryu” komandasından Türkiyənin “Ərzurumspor” komandasına transferinin pərdəarxası barədə yayılan məlumatlara münasibət bildirib.
İdman.Biz xəbər verir ki, agentlik futbolçunun fiziki hazırlıq məşqlərinə laqeyd yanaşması və intizamsız davranışlara yol verməsi barədə iddiaların həqiqəti əks etdirmədiyini açıqlayıb.
Şirkətin yaydığı rəsmi açıqlamada Nəriman Axundzadənin bu səbəbdən məşqçilər heyəti tərəfindən cəzalandırıldığına dair məlumatlar da təkzib olunub.
Açıqlamada bildirilib ki, futbolçu məşq prosesinə və üzərinə düşən öhdəliklərə hər zaman məsuliyyətlə yanaşır:
“Nəriman peşəkar futbolçu kimi məşq prosesinə və üzərinə düşən öhdəliklərə hər zaman məsuliyyətlə yanaşır. Onun gələcək karyerası ilə bağlı qərarlar intizam problemi ilə deyil, peşəkar inkişafı və idman perspektivləri nəzərə alınaraq qəbul edilir”.
Agentlik əlavə edib ki, yayılan iddialar Nəriman Axundzadənin peşəkarlığı və karyerası ilə bağlı mövcud vəziyyəti düzgün əks etdirmir.
