Georgi Adamiya: “Qarabağ” qanının son damlasına kimi döyüşəcək, özüm də gələcəm”

Xəbərlər
1 Mart 2024 11:22
Georgi Adamiya: “Qarabağ” qanının son damlasına kimi döyüşəcək, özüm də gələcəm”

“Əla emosiyalar idi. “Braqa”ya qarşı 10 nəfərlə oynayıb, 0:2 hesabı ilə geriyə düşdükdən sonra vacib qolu vurmaq unudulmaz hisslərdir”.

Bunu İdman.bizə “Qarabağ”ın sabiq futbolçusu Georgi Adamiya deyib.

Gürcüstanlı veteran hücumçu Azərbaycan çempionunun Avropa Liqasında uğurlu çıxış etdiyini bildirib. “Braqa” üzərində inamlı qələbəni xüsusi qeyd edən Adamiya 1/8 finalda sabiq komandasının işinin asan olmayacağını vurğulayıb: “Bayer” nəinki cütün, yarışın əsas favoritidir. Onların çox yaxşı heyəti var və bunu qrup mərhələsində də, Bundesliqada da görürük. Amma bu, futboldur. Hər şey ola bilər. Ağdamlıların bu matçlarda böyük hesabla məğlub olacağını düşünmürəm. Məncə, “Qarabağ” qanının son damlasına kimi döyüşəcək”.

42 yaşlı mütəxəssis bütün qəlbilə “Qarabağ”a dəstək olduğunu da deyib: “Əgər alınsa, bu oyunu izləmək üçün Bakıya gələcəm. Onlara uğurlar arzu edirəm. Ümid edirəm ki, yenə mərhələ adlayarlar”.

Qeyd edək ki, “Qarabağ” martın 7-də “Bayer”i Bakıda qəbul edəcək. Cavab qarşılaşması 1 həftə sonra Almaniyada baş tutacaq.

Emin Ağa
İdman.biz