Almaniya millisinin sabiq futbolçusu, hazırda "Sky Sport"un eksperti olan Ditmar Hamann Dortmund “Borussiya”sının Azərbaycan təmsilçisi “Sabah” üzərində 2:1 hesablı qələbəsini həm psixoloji, həm də turnir baxımından mühüm nəticə adlandırıb.
İdman.Biz "Sky Sport Deutschland"a istinadən xəbər verir ki, Hamann müəllif köşəsində Bakıdakı qələbə sayəsində Niko Kovaçın komandasının UEFA Çempionlar Liqasının 1/8 finalına birbaşa vəsiqə qazanmaq şansını qoruduğunu bildirib.
Ekspertin sözlərinə görə, Norveçin “Budyo-Qlimt” klubuna 0:1 hesablı məğlubiyyətdən və Bundesliqada ardıcıl iki heç-heçədən sonra Dortmund təmsilçisi üçün yenidən qələbə yoluna qayıtmaq vacib idi. Komandanın əsas oyunçularından Konstantinos Karetsasın zədələnməsi isə vəziyyəti daha da çətinləşdirib.
“Dortmund əvvəlki sürətini itirmişdi. Karetsasın zədəsini də nəzərə alsaq, Azərbaycandakı oyun Niko Kovaçın komandası üçün psixoloji baxımdan da asan deyildi”, - deyə Hamann vurğulayıb.
Onun fikrincə, “Sabah” üzərində qələbə “Borussiya” üçün mütləq qazanılmalı olan nəticə idi. Lakin bu uğurun əhəmiyyəti yalnız üç xalla məhdudlaşmır. Almaniyalı ekspert hesab edir ki, Bakıdakı qələbə futbolçuların özünəinamını bərpa etməsinə də kömək etməlidir.
Hamannın sözlərinə görə, Dortmund klubu artıq Çempionlar Liqasında ən azı pley-off mərhələsinin keçid oyunlarında iştirakını demək olar ki, təmin edib. Bununla belə, komandanın birbaşa 1/8 finala yüksəlib-yüksəlməyəcəyi hələ məlum deyil.
Ekspert diqqətə çatdırıb ki, “Borussiya” turnirin ümumi cədvəlində Münhen “Bavariya”sını bir xal və bir pillə qabaqlayır.
Hamann Karetsasın komandadakı roluna da toxunub. Onun fikrincə, oktyabrın 31-də “Bavariya” ilə keçiriləcək prinsipial qarşılaşmada futbolçunun iştirakı xüsusilə vacib olacaq. Çünki Karetsas demək olar ki, heç nədən qol fürsəti yarada və komanda yoldaşlarının oyun keyfiyyətini yüksəldə bilən futbolçudur.
Xatırladaq ki, oktyabrın 20-də Bakıda keçirilən UEFA Çempionlar Liqasının Liqa mərhələsinin üçüncü turunun oyununda “Sabah” Dortmund “Borussiya”sına 1:2 hesabı ilə məğlub olub. Qonaqların heyətində Seru Qirassi dubla imza atıb, Azərbaycan təmsilçisinin yeganə qolunu isə Eyden Makkarti vurub.
