UEFA Millətlər Liqasının qarşıdakı oyunları üçün Polşa yığmasının heyətinə çağırılan Masazırın “Sabah” futbol klubunun müdafiəçisi Timoteuş Puxaç millinin heyətində məşqə çıxıb.
İdman.Biz xəbər verir ki, məşq zamanı sol cinah müdafiəçisi Polşa futbolunun canlı əfsanəsi Robert Levandovski ilə səmimi söhbət edib, futbolçular isinmə hərəkətlərini icra ediblər.
Qeyd edək ki, Timoteuş Puxaç təxminən iki ildən sonra Polşa millisinin heyətinə qayıdıb. Müdafiəçi sonuncu dəfə 2024-cü il noyabrın 18-də Millətlər Liqasının Şotlandiyaya qarşı oyununda (1:2) milli formanı geyinib. Həmin qarşılaşmada meydana sonradan daxil olan futbolçu 27 dəqiqə oynayıb.
Timoteuş Puxaç Polşa millisində ümumilikdə 15 oyuna çıxıb.
Polşa millisi qarşıdakı toplanış çərçivəsində Millətlər Liqasında dörd oyun keçirəcək. Sentyabrın 25-də Bosniya və Herseqovinanı qəbul edəcək komanda, 28-də səfərdə İsveçlə, oktyabrın 2-də evdə Rumıniya ilə qarşılaşacaq. Oktyabrın 5-də isə Bosniya və Herseqovina ilə cavab oyununa Zeniçada çıxacaq.
