Şəhriyar Məmmədyarov Aronyana armageddonda uduzdu

18 Noyabr 2026 23:53
64
Şəhriyar Məmmədyarov Aronyana armageddonda uduzdu

Azərbaycan şahmatçısı Şəhriyar Məmmədyarovun Budapeştdə keçirilən “Total Chess World Championship Tour Pilot 2026” turnirində Levon Aronyanla qarşılaşması yekunlaşıb.

İdman.Biz xəbər verir ki, 13-16-cı yerlər uğrunda keçirilən duelin qalibi armageddon partiyasında müəyyənləşib. Ağ fiqurlarla oynayan təmsilçimiz ABŞ şahmatçısına məğlub olub.

Məmmədyarov noyabrın 17-də keçirilən ilk oyun gününü 11:9 hesablı qələbə ilə tamamlasa da, ikinci gündə 6.5:13.5 hesabı ilə uduzub.

Şəhriyar bu gün dörd blits partiyasında bir heç-heçə edib, üç dəfə məğlub olub. İki rapid görüşündə isə bir heç-heçə və bir məğlubiyyət qeydə alınıb. Günün sonuncu, sürətli klassika partiyası heç-heçə başa çatıb.

Reqlamentə əsasən, hər günün nəticəsi ayrıca hesablandığından tərəflərin bir gün qalib gəlməsi həlledici armageddon partiyasını zəruri edib. Bu görüşdə üstün olan Aronyan 13-14-cü yerlər uğrunda oynamaq hüququ qazanıb.

Məmmədyarov isə noyabrın 19-20-də 15-16-cı yerlər uğrunda almaniyalı Vinsent Keymerlə qarşılaşacaq.

İdman.Biz