“Kəpəz”in baş məşqçisi Azər Məmmədov “Şəfa” üzərində qazanılan qələbədən sonra komandasının oyununu dəyərləndirib, uğurlu seriyanın səbəblərindən və Gəncə klubunun gələcəyindən danışıb.
İdman.Biz xəbər verir ki, mütəxəssis oyundan sonra keçirilən mətbuat konfransında komandasının iki hissədə fərqli çıxış etdiyini etiraf edib.
Məmmədovun sözlərinə görə, “Kəpəz” zədəli futbolçular səbəbindən qarşılaşmaya müəyyən itkilərlə çıxsa da, ilk hissədə rəqibindən üstün oynayıb və hesabı açmağa layiq olub. Lakin hücumların tamamlanmasında dəqiqliyin çatışmaması komandanın qol vurmasına mane olub.
Fasilədən sonra isə vəziyyət dəyişib. “Şəfa” təzyiqi artıraraq hesabı açmağa nail olub. Bununla belə, “Kəpəz”in məşqçilər korpusunun oyun sistemində etdiyi dəyişikliklər öz bəhrəsini verib. Məmmədovun fikrincə, məhz bu taktiki düzəlişlər və futbolçuların yaxşı çıxışı sayəsində Gəncə təmsilçisi oyunun gedişini dəyişərək layiqli qələbə qazanıb.
Komandanın uğurlu seriyasından danışan baş məşqçi bildirib ki, hazırkı nəticələr futbolçuların çəkdiyi zəhmətin bəhrəsidir. Onun sözlərinə görə, oyunçular matçdan-matça öz oyunlarını tapır, bir-birinə daha yaxşı uyğunlaşır və komandanın çıxışında irəliləyiş hiss olunur.
Bununla yanaşı, Məmmədov əldə olunan nəticələri həddindən artıq yüksək qiymətləndirməyin tərəfdarı deyil. Mütəxəssis toplanılan xallara və turnir cədvəlindəki mövqeyə baxmayaraq, komandanın hələ çox işləməli olduğunu vurğulayıb. O hesab edir ki, “Kəpəz” hazırda yüksək yerlər uğrunda mübarizə aparmağa hazır deyil, lakin futbolçuların daha böyük potensialı var.
Baş məşqçi heyətin gücləndirilməsində və yeni transferlərin həyata keçirilməsində maraqlı olduqlarını da təsdiqləyib. Eyni zamanda, o, komandanın qış fasiləsinə qədər hazırkı uğurlu çıxışını davam etdirməsinin belə böyük nailiyyət sayılacağını bildirib.
Məmmədov “Kəpəz”in əvvəlki illərdə üzləşdiyi problemlərə də toxunub. Onun fikrincə, klubun qeyri-sabit çıxışının əsas səbəblərindən biri heyətin və rəhbərliyin tez-tez dəyişməsidir.
Mütəxəssis bildirib ki, “Kəpəz” hər il dağılır və sonra yenidən formalaşdırılır. Üstəlik, dəyişikliklər yalnız futbolçular səviyyəsində deyil, klub rəhbərliyində də baş verir. Onun sözlərinə görə, Gəncə təmsilçisində uzun illər ərzində lazımi sabitlik olmayıb.
Baş məşqçi hazırkı rəhbərliyin bu vəziyyəti dəyişəcəyinə ümid etdiyini vurğulayıb. O qeyd edib ki, komandanın müsbət nəticələrində təkcə futbolçuların və məşqçilərin deyil, klubda sağlam və sistemli iş quran digər əməkdaşların da əməyi var.
Məmmədov hesab edir ki, hazırkı iş prinsipi qorunub saxlanılarsa və kluba əlavə maliyyə, o cümlədən sponsor dəstəyi göstərilərsə, “Kəpəz” ildən-ilə daha güclü komandaya çevrilə və Azərbaycan futbolundakı əvvəlki mövqeyini bərpa edə bilər.
Baş məşqçi, həmçinin komandanı dəstəkləmək üçün uzaq məsafə qət edərək stadiona gələn azarkeşlərə təşəkkürünü bildirib. O, azarkeş dəstəyinin hazırkı uğurlu nəticələrin əldə olunmasında mühüm rol oynadığını xüsusi vurğulayıb.
