İngiltərə Premyer Liqasının sabiq hakimi Qrem Skott “Arsenal”ın baş məşqçisi Mikel Artetanı hakimlər üçün ən çətin mütəxəssis adlandırıb.
İdman.Biz “The Athletic FC Podcast”a istinadən xəbər verir ki, uzun illər İngiltərə çempionatında hakimlik etmiş Skott ispaniyalı məşqçinin texniki zonadakı davranışlarını kəskin tənqid edib.
O, hakimlərin işləməkdə ən çox çətinlik çəkdiyi baş məşqçi barədə suala belə cavab verib:
“Ən sadə cavab budur ki, komandaları məğlub olanda bütün məşqçilər çətinlik yaradırlar. Ancaq açıq danışsam, bilirəm ki, indi nə desəm, məni tənqid edəcəklər və Artetaya nifrət etdiyimi söyləyəcəklər. Buna baxmayaraq, cavabım Artetadır. Onunla işləmək ən çətinidir. O, daim icazə verilən sərhədləri aşmağa çalışır”.
Skott Artetanın davranışlarının səbəbini anladığını, lakin bunun hakimlərin işinə ciddi maneə yaratdığını vurğulayıb:
“Əslində, müəyyən mənada buna etiraz etmirəm. O, komandasına rəqabət üstünlüyü qazandırmağa çalışır. Bu, normaldır, onun işinin bir hissəsidir. Sərhədləri yoxlamağa haqqı var, bizim vəzifəmiz isə qaydalara əməl olunmasını təmin etməkdir. Amma Arteta işimizi həddindən artıq çətinləşdirir. O, daim texniki zonasını tərk edir”.
Sabiq hakim fikirlərini əsaslandırmaq üçün “Arsenal”ın “Everton” üzərində 2:0 hesablı qələbəsini nümunə göstərib. Onun sözlərinə görə, Arteta həmin görüşdə dəfələrlə texniki zonasının hüdudlarından kənara çıxıb:
“Bu yaxınlarda onun ‘Everton’la oyundakı davranışını izlədim. ‘Everton’ topa onun tərəfindəki yan xəttin yaxınlığında sahib olan kimi Arteta sanki özü də pressinqə qoşulurdu. Ayaqları, demək olar ki, meydanın yan xəttinin üzərində idi. Dördüncü hakim üçün bu, əsl kabusdur”.
Skott belə vəziyyətlərdə qaydaları tətbiq etməyin niyə çətin olduğunu da izah edib. Onun sözlərinə görə, hakim müdaxilə etmək üçün hərəkətə keçənədək epizod başa çatır və xəbərdarlıq artıq mənasız görünə bilir.
Sabiq referi Artetaya qarşı hakimlərin özlərinin də kifayət qədər prinsipial davranmadıqlarını etiraf edib:
“Artetaya həddindən artıq güzəşt edilir. Hakimlər onunla daha sərt davranmalıdırlar. Mən də ona belə hərəkətlər etməyə imkan verən hakimlərdən biri olmuşam və bunu inkar etmirəm. Onunla işləmək həqiqətən çox çətin idi. Digər məşqçilər yalnız müəyyən vaxtlarda problem yaradırdılarsa, Arteta ilə bu çətinlik demək olar ki, daim yaşanırdı”.
Bununla belə, Skott bütün digər baş məşqçilərin nümunəvi davranmadığını da vurğulayıb. O, sakit xarakteri ilə seçilən Qrem Potteri misal gətirərək bəzi mütəxəssislərin hakimlərlə ümumiyyətlə mübahisəyə girmədiyini bildirib. Lakin belə məşqçilərin də bəzən kifayət qədər emosional görünmədiklərinə görə tənqid edildiklərini xatırladıb.
Arteta isə daha əvvəl texniki zonanın qaydalarını pozan yeganə məşqçi olmadığını bildirmişdi. İspaniyalı mütəxəssis digər məşqçilərin dəfələrlə texniki zonanı tərk etdiyini, lakin buna görə cəzalandırılmadığını iddia edib.
“Bəzi məşqçilər 10 dəqiqə ərzində 36 dəfə texniki zonanı tərk edirlər, amma sarı vərəqə almırlar. Mən bütün bu epizodların görüntülərini toplayıram”, - deyə Arteta açıqlamışdı.
Qeyd edək ki, “Arsenal”ın “Everton”u 2:0 hesabı ilə məğlub etdiyi qarşılaşmada Arteta mövsümdə ikinci sarı vərəqəsini alıb. O, daha bir xəbərdarlıq alacağı təqdirdə bir oyunluq texniki zona cəzası ilə üzləşəcək.
