“Roma” və “İnter” İtaliya A Seriyasının beşinci turunun oyununda 2:2 hesablı heç-heçə ediblər.
İdman.Biz xəbər verir ki, oyun Romada keçirilib. Meydan sahibləri birinci hissədə cavabsız iki qol vurublar - Manu Kone dubl edib. Fransalı futbolçu altıncı və 37-ci dəqiqələrdə fərqlənib.
“İnter” qarşılaşmanın ikinci hissəsində hesabı bərabərləşdirə bilib. 46-cı dəqiqədə Lautaro Martines qonaqların hesabdakı fərqini azaldıb, 79-cu dəqiqədə isə ikinci qolunu vurub.
Hər iki komanda ilk beş turda 13 xal toplayıb. “Roma” əlavə göstəricilərə görə rəqibini qabaqlayır və A Seriyasının turnir cədvəlinə başçılıq edir, “İnter” isə ikinci pillədədir.
Turun digər oyununda isə “Latsio” səfərdə “Venesiya”ya 2:0 hesabı ilə qalib gəlib.
Meydan sahibləri birinci hissədə hesabı aça bilərdilər, lakin Con Yeboa penaltini dəqiq yerinə yetirə bilməyib.
51-ci dəqiqədə Mattia Dzakkanyi 11 metrlik cərimə zərbəsindən qonaqları hesabda önə çıxarıb. Doqquz dəqiqə sonra Ticanı Noslin qonaqların üstünlüyünü iki topa çatdırıb.
“Latsio” ilk beş turda dördüncü qələbəsini qazanıb və 13 xalla A Seriyasında üçüncü pilləyə yüksəlib. “Venesiya” (0 xal) ardıcıl beşinci məğlubiyyətini alıb və turnir cədvəlində sonuncu yerdə qalır.
19:19
İtaliya A Seriyasının beşinci turunda “Bolonya” və “Torino” qarşılaşıb.
İdman.Biz xəbər verir ki, görüş 1:1 hesablı heç-heçə ilə yekunlaşıb.
Hesabı 14-cü dəqiqədə “Bolonya”nın yarımmüdafiəçisi Federiko Bernardeski açıb. “Torino”nun hücumçusu Sandro Kulenoviç 77-ci dəqiqədə son hesabı müəyyənləşdirib.
Qeyd edək ki, bu, Domeniko Tedeskonun istefaya göndərilməsindən sonra “Bolonya”nın ilk matçı olub.
Bu nəticədən sonra “Torino” 4 xalla 14-cü, “Bolonya” isə 2 xalla 17-ci pillədə qərarlaşıb.
Paralel keçən qarşılaşmada “Kalyari” səfərdə “Udineze”ni 1:0 hesabı ilə məğlub edib.
Görüşün yeganə qolunu 54-cü dəqiqədə Daniel Maldini vurub. Paolo Maldininin oğlu bununla da “Kalyari”nin ardıcıl üçüncü matçında qələbə qolunun müəllifi olub.
24 yaşlı futbolçu bundan əvvəl “Atalanta” (2:1) və “Leççe” (1:0) ilə görüşlərdə də komandasına qələbə qazandıran qollara imza atıb.
Qeyd edək ki, Daniel Maldini “Milan”ın yetirməsidir. Hazırda onun transfer hüquqları “Atalanta”ya məxsusdur.
