Futbol üzrə Almaniya Bundesliqasında “Auqsburq” doğma meydanda növbəti qələbəsini qazanıb. Komanda onuncu tur çərçivəsində “Maynts”ı 3:1 hesabı ilə məğlub edib.
İdman.Biz xəbər verir ki, meydan sahibləri ilk hissədə iki dəfə fərqlənərək fasiləyə üstün yollanıblar.
Hesabı 19-cu dəqiqədə Mixael Qreqoriç açıb. 36-cı dəqiqədə Abdulay Cuma Ba fərqi artırıb.
İkinci hissəyə də fəal başlayan “Auqsburq” 48-ci dəqiqədə üçüncü qolu vurub. Qreqoriç ikinci dəfə rəqib qapısına yol taparaq dublunu rəsmiləşdirib.
“Maynts” 51-ci dəqiqədə Ransford-Yeboa Könnqsdörfferin qolu ilə hesab arasındakı fərqi azaltsa da, görüşün nəticəsini dəyişə bilməyib.
Qalib komanda xallarını 12yə çatdıraraq 10-cu pilləyə yüksəlib. "Maynts" isə 10 xalla 13-cüdür.
