Səudiyyənin “Əl-Hilal” futbol komandasının hücumçusu Kərim Benzema gələcək karyerası ilə bağlı açıqlama verib.
İdman.Biz xəbər verir ki, 38 yaşlı futbolçu jurnalist Fabritsio Romanoya açıqlamasında komandada qalacağını deyib.
“Mən “Əl-Hilal”da qalıram”, – deyə Benzema bildirib.
Fransalı hücumçu 2026-cı ilin fevralında “Əl-İttihad”dan ayrıldıqdan sonra “Əl-Hilal”a keçib.
Benzema peşəkar karyerasına “Lion”da başlayıb. O, 2009-cu ildə “Real”a transfer olunub və Madrid klubunda 14 mövsüm keçirib. Bu müddətdə 25 titul, o cümlədən beş dəfə UEFA Çempionlar Liqasını qazanıb.
Kərim Benzema 2022-ci ildə “Qızıl top” mükafatına layiq görülüb. O, 2023-cü ilin yayında “Real”dan ayrılaraq “Əl-İttihad”a keçib və bu klubla Səudiyyə Ərəbistanı çempionu, həmçinin ölkə kubokunun qalibi olub.
