"Sabah" UEFA Çempionlar Liqasının pley-off mərhələsinin ilk oyununda "Hapoel Beer-Şeva"ya 1:2 hesabı ilə məğlub olub.
İdman.Biz xəbər verir ki, Buxarestdə keçirilən qarşılaşmada hesabı 6-cı dəqiqədə "Sabah"ın futbolçusu Velko Simiç açıb.
"Hapoel Beer-Şeva" 43-cü dəqiqədə Ceyvon İstin qolu ilə tarazlığı bərpa edib. İsrail təmsilçisinin qələbə qolunu isə 80-ci dəqiqədə İqor Zlatanoviç vurub.
Beləliklə, "Sabah" cavab oyunu öncəsi minimal hesablı məğlubiyyət alıb.
Tərəflər arasında cavab qarşılaşması avqustun 25-də Bakıda keçiriləcək.
Paralel keçən oyunlarda "Seltik" LASK-ı 3:0 hesabı ilə məğlub edib. "Seltik"də qolların ikisini "Qarabağ"ın keçmiş hücumçusu Kamilo Duran vurub. "Slovan Bratislava" - "Tsele" görüşü isə 1:1 hesabı ilə başa çatıb. "Bodo-Qlimt" səfərdə NEC üzərində 3:0 hesablı qələbə qazanıb.
00:38
"Hapoel Beer-Şeva" İqor Zlatanoviçin 79-cu dəqiqədə vurduğu qolla hesabda önə çıxır - 2:1.
00:05
UEFA Çempionlar Liqasının pley-off mərhələsi çərçivəsində keçirilən "Hapoel Beer-Şeva" - "Sabah" qarşılaşmasında ikinci hissə başladı.
İdman.Biz xəbər verir ki, ilk 45 dəqiqədən sonra hesab 1:1-dir.
23:49
UEFA Çempionlar Liqasının pley-off mərhələsi çərçivəsində keçirilən "Hapoel Beer-Şeva" - "Sabah" qarşılaşmasında ilk hissə başa çatıb.
İdman.Biz xəbər verir ki, qarşılıqlı hücumlar şəraitində keçən 45 dəqiqədə qapılara iki qol vurulub və hesab bərabərdir - 1:1.
Oyunun 6-cı dəqiqəsində "Sabah"ın heyətindən Velko Simiç hesabı açıb. 43-cü dəqiqədə isə rəqibin heyətindən Ceyvon İst fərqlənib.
23:45
Oyunun 43-cü dəqiqəsində "Hapoel Beer-Şeva"nın oyunçusu Ceyvon İst hesabı bərabərləşdirir - 1:1.
23:07
"Sabah"ın heyətindən Velko Simiç 6-cı dəqiqədə hesabı açır - 0:1.
22:56
UEFA Çempionlar Liqasının pley-off mərhələsi çərçivəsində keçirilən ilk oyunlar başladı.
İdman.Biz xəbər verir ki, Azərbaycan çempionu "Sabah" səfərdə İsrailin "Hapoel Beer-Şeva" futbol klubu ilə qarşılaşır.
22:31
Bu gün "Sabah" UEFA Çempionlar Liqasının təsnifat mərhələsinin pley-offunda ilk oyununu keçirəcək.
İdman.Biz xəbər verir ki, Valdas Dambrauskasın komandası İsrailin "Hapoel Beer-Şeva" klubu ilə qarşılaşacaq. Matç neytral meydanda, Rumıniyanın Buxarest şəhərində keçiriləcək.
Komandaların start heyətləri məlum olub.
"Hapoel Beer-Şeva": Ofir Marsiano, Migel Vitor (k), İtay Rotman, Qay Mizrahi, Pedro Amador, Niv Yeoşua, Lukas Ventura, Eliel Perets, Ceyvon İst, Zahi Ahmad, İqor Zlatanoviç.
Baş məşqçi: Ran Kojux.
"Sabah": Stas Pokatilov (k), Stiv Solvet, Rəhman Daşdəmirov, Akim Zedadka, Timoteuş Puxaç, İvan Lepinitsa, Umarali Rahmonaliyev, Aleksey İsayev, Velko Simiç, Ksander Severina, Coy-Lans Mikkels.
Baş məşqçi: Valdas Dambrauskas.
Görüş "Giuleşti" stadionunda keçiriləcək və Bakı vaxtı ilə saat 23:00-da başlayacaq. Matçın baş hakimi italiyalı Davide Massadır.
Cavab oyunu avqustun 25-də Bakıda keçiriləcək.
09:13
Bu gün UEFA Çempionlar Liqasının pley-off mərhələsində ilk oyunlar keçiriləcək.
İdman.Biz xəbər verir ki, Azərbaycan təmsilçisi "Sabah" İsrailin "Hapoel Beer-Şeva" futbol klubu ilə üz-üzə gələcək. Qarşılaşma təhlükəsizlik səbəbindən Rumıniyanın paytaxtı Buxarestdəki "Quleşti" stadionunda təşkil olunacaq.
Görüş Bakı vaxtı ilə saat 23:00-da başlayacaq. Bu, "Sabah"ın klub tarixində Çempionlar Liqasının pley-off mərhələsində ilk oyunu olacaq.
"Sabah" üçüncü təsnifat mərhələsində Danimarkanın "Orhus" klubunu mübarizədən kənarlaşdırıb. Bakıdakı cavab görüşündə rəqibinə 4:0 hesabı ilə qalib gələn Azərbaycan təmsilçisi iki oyunun nəticəsinə görə 5:2 hesablı üstünlüklə pley-offa yüksəlib. "Hapoel Beer-Şeva" isə Serbiyanın "Srvena Zvezda" klubunu iki oyunun yekununda 3:0 hesabı ilə üstələyib.
Bu cütün qalibi UEFA Çempionlar Liqasının əsas mərhələsinə vəsiqə qazanacaq. Cavab qarşılaşması avqustun 25-də Bakıda keçiriləcək. Tofiq Bəhramov adına Respublika stadionundakı oyun Bakı vaxtı ilə saat 20:45-də başlayacaq.
Bu gün Çempionlar Liqasının pley-off mərhələsində daha üç oyun keçiriləcək. Şotlandiyanın "Seltik" futbol klubu Avstriyanın LASK komandası ilə, Slovakiyanın "Slovan Bratislava" klubu Sloveniyanın "Tsele" təmsilçisi ilə, Niderlandın NEC komandası isə Norveçin "Bodo-Qlimt" klubu ilə qarşılaşacaq. Bütün bu görüşlərin start fiti Bakı vaxtı ilə saat 23:00-da səslənəcək.
19 avqust
Çempionlar Liqası, pley-off mərhələsi
23:00 "Hapoel Beer-Şeva" – "Sabah"
23:00 "Seltik" – LASK
23:00 "Slovan Bratislava" – "Tsele"
23:00 NEC – "Bodo-Qlimt"
