“Arsenal”ın yarımmüdafiəçisi Deklan Rays bir həftə ərzində iki dəfə sürət həddini aşdığı üçün altı ay müddətinə avtomobil sürmək hüququndan məhrum edilib.
İdman.Biz “Daily Mail” qəzetinə istinadla xəbər verir ki, yarımmüdafiəçi 3 yanvarda sürət həddini aşarkən tutulub.
O, Londonun cənub-qərbindəki Surrey şəhərindəki malikanəsinin yaxınlığındakı sürət həddi 48 km/saat olan magistral yolda saatda 60 km/saat sürətlə hərəkət edib.
Cəmi beş gün sonra, 8 yanvarda futbolçu yenidən yaxalanıb. Bu dəfə o, eyni yolda saatda 79 km/saat sürətlə hərəkət edib. Raysa həmçinin 2185 funt sterlinq cərimə yazılıb.
Rays bu mövsüm “Arsenal”ın heyətində bütün yarışlarda 28 oyun keçirib, dörd qol vurub və beş məhsuldar ötürmə edib.
