Azərbaycanlı cüdoçu Əhməd Yusifov Bakıda keçirilən dünya çempionatında qazandığı qələbədən sonra 60 kq çəki dərəcəsində ilk dəfə dünya reytinqinə başçılıq etməlidir. O, hazırda beşinci pillədə qərarlaşıb.
İdman.Biz xəbər verir ki, Əhməd Yusifov karyerasında ilk dünya çempionu tituluna görə 2000 reytinq xalı qazanacaq və bu xallar tam həcmdə nəzərə alınacaq.
Bununla yanaşı, Beynəlxalq Cüdo Federasiyasının (IJF) reytinqində son 12 ay ərzində idmançının yalnız ən yaxşı 6 nəticəsi nəzərə alınır. Buna görə də 2000 xal dəyərində olan yeni nəticə Yusifovun əvvəlki nəticələrindən 350 xal dəyərində olan birini ən yaxşı altılıqdan çıxaracaq.
Qeyd edək ki, ilk 12 ay ərzində qazanılan xallar 100 faiz həcmində nəzərə alınır, növbəti 12 ayda isə onların 50 faizi hesablanır. Bundan sonra xallar tamamilə ləğv olunur. Bununla yanaşı, bu dövrlərin hər birində idmançının ən yaxşı 6 nəticəsi reytinq hesablamasına daxil edilir.
Hesablamalarımıza görə, Bakıda keçirilən dünya çempionatının başa çatmasından sonra reytinq növbəti dəfə yenilənərkən Yusifovun 5180 xalı olacaq.
Hesablamanın xüsusiyyəti Lima Qran-prisindəki nəticə ilə bağlıdır. Yusifov 11 oktyabr 2025-ci ildə həmin turnirdə ikinci yeri tutaraq 490 reytinq xalı qazanıb. Bakıdakı dünya çempionatından sonra, oktyabrın 12-də reytinq yenilənərkən bu nəticə son 12 ayın çərçivəsindən çıxacaq və artıq 50 faiz həcmində – 245 xal kimi nəzərə alınacaq.
Bununla yanaşı, Yusifovun aktivinə Bakıda dünya çempionatında qazandığı qələbəyə görə 2000 xal tam həcmdə əlavə olunacaq. Yenidən hesablamadan sonra onun son 12 ayda qazandığı ən yaxşı 6 nəticə 4470 xal, əvvəlki 12 aylıq dövrün nəticələri isə daha 710 xal gətirəcək. Beləliklə, ümumi xal 5180 olacaq.
Bu arada, dünya çempionatından əvvəl 4 620 xalla birinci pillədə qərarlaşan Balabəy Ağayev ikinci yerə enməlidir. O, Bakıdakı çıxışına görə 320 xal qazanacaq, lakin bu nəticə onun ən yaxşı 6 nəticəsi arasında 112 xal dəyərində olan nəticəni əvəzləyəcək. Bundan əlavə, 5 xal dəyərində olan köhnə nəticələrindən biri də reytinqdən çıxacaq. Nəticədə Ağayevin 4823 xalı olacaq.
Üçüncü pilləyə 4600 xalla rusiyalı Ayub Bliev yüksəlməlidir. Braziliyalı Mişel Auqusto 4121 xalla dördüncü, israilli İzhak Aşpiz isə 3993 xalla beşinci yerdə qərarlaşacaq.
Beləliklə, Bakıdakı dünya çempionatından sonra IJF-nin 60 kq çəki dərəcəsində reytinqinin ilk iki pilləsini Azərbaycanın iki təmsilçisi – Əhməd Yusifov və Balabəy Ağayev tutmalıdır.
Əlavə edək ki, IJF-nin rəsmi yenilənmiş reytinqi hələ açıqlanmayıb. Buna görə də yuxarıda göstərilən göstəricilər hesablamalara əsaslanır və Beynəlxalq Cüdo Federasiyasının hazırkı reytinq qaydaları nəzərə alınmaqla müəyyən edilib.
