Bu gün İsveçrənin Lozanna şəhərində cüdo üzrə “Böyük Dəbilqə” turnirinə start veriləcək.
İdman.Biz xəbər verir ki, yarışın ilk günündə Azərbaycan millisinin beş üzvü üç çəki dərəcəsində mübarizə aparacaq.
Qadınların 52 kq çəki dərəcəsində Gültac Məmmədəliyeva 1/16 finalda tacikistanlı Madina Qurbonzoda ilə, Leyla Əliyeva isə yaponiyalı Rin Takeuçi ilə qarşılaşacaq.
Kişilərin 60 kq çəki dərəcəsində Əhməd Yusifov 1/16 finalda macarıstanlı David Naji ilə tacikistanlı Loiq Kudbudinov arasındakı görüşün qalibi ilə üz-üzə gələcək.
66 kq-da Turan Bayramov 1/32 finalda ABŞ təmsilçisi Lenni Şeynfeldlə, Ruslan Paşayev isə 1/16 finalda bəhreynli Suxrob Boqiyevlə qarşılaşacaq.
Qeyd edək ki, təsnifat mərhələsinin görüşləri saat 10:30-da, final bloku isə saat 19:00-da başlayacaq.
Xatırladaq ki, Los-Anceles-2028 Yay Olimpiya Oyunlarına lisenziya xalları verən turnirdə Azərbaycan 9 çəki dərəcəsində 14 cüdoçu (10 kişi, 4 qadın) ilə təmsil olunur. “Böyük Dəbilqə” avqustun 30-da başa çatacaq.
