“Bu yarış ilk dəfə keçirildiyinə görə narahat idik. Amma yarış gözlədiyimizdən də coşğulu keçdi”.
Bunu İdman.biz saytına Azərbaycan Respublikası Atçılıq Federasiyasının vitse-prezidenti Bəhruz Nəbiyev deyib.
Nəbiyev Bakıda keçirilən çövkən üzrə ilk dünya çempionatının uğurlu alındığını bildirib. Federasiya rəsmisi növbəti mundialın vaxtını da açıqlayıb: “Yarışa qatılanların hər biri polo oyunçusu idi. Polo da çövkəndən yarandığına görə oyunçular onun fəlsəfəsini bilirdilər. Sadəcə müəyyən qayda dəyişiklikləri var idi. 1 aydan artıq müddətdə onlara bunları izah etdik. Bu dəfə turnirdə 6 milli iştirak edirdi. Amma bizim məqsədlərimiz komanda sayını bütün qitələri təşkil edəcək şəkildə artırmaqdır. Çövkən milli oyunu üzrə 2-ci dünya çempionatını gələn ilin sentyabrında təşkil etməyi düşünürük. Növbəti yarışları azarkeşlər 6 deyil 8, 10, 12, 14 komandanın iştirakı ilə izləyəcək. Sentyabrda yarış açıq havada keçiriləcək. Oyunlarda iştirakçı sayı hər komandada 4 deyil, 5 olacaq. Bir qədər də uzaq zamanda qitə birincilikləri, klublar arası çempionatların keçirilməsini nəzərdə tutmuşuq. İlkin məqsədimiz bu dünya çempionatını hər il müntəzəm və 6 yox daha çox milli komandanın iştirakı ilə keçirməkdir”.
Qeyd edək ki ilk dəfə keçirilən dünya çempionatının qalibi Azərbaycan olub. Millimiz finalda Mərakeşi (4:0) məğlub edib.
Emin Ağa
İdman.biz
