“Turan Tovuz”un futbolçusu Emmanuel Hakmanın Sportnet.az-a müsahibəsi
– Azərbaycan Premyer Liqasının III turunda “Neftçi” ilə keçirdiyiniz oyunu necə dəyərləndirirsiniz?
– Oyun çox çətin keçdi. “Neftçi” bu mövsüm ötən illə müqayisədə daha yaxşı çıxış edir. Amma biz də sona qədər mübarizə apardıq və nəticə etibarilə qələbə qazandıq. Çox sevincliyəm.
– “Neftçi” ilə oyunların fərqli ab-havası var. Siz necə hiss etdiniz?
– Bəli, hər oyun gərgin keçir, amma “Neftçi” ilə oyunların xüsusi gərginliyi olur. Mən hər şeyə hazıram, özümü güclü hiss edirəm və belə qarşılaşmalarda da yaxşı mübarizə aparıram.
– Meydançanın vəziyyəti necə idi?
– Deyə bilərəm ki, ot örtüyü bir az yüngül idi, amma oynamağa mane olmurdu. Çox da irad bildirə bilmərəm.
– 10 nəfərlə mübarizə aparan “Neftçi”yə qarşı müdafiə oyunu oynadınız. Bununla bağlı nə deyə bilərsiniz?
– Bu taktiki gediş idi məşqçimiz nə dedisə, hamısını yerinə yetirdik. Bunun nəticəsini də meydanda gördük. Qələbə qazandığımız üçün çox sevincliyik.
İdman.biz
