San-Marino ilə debütdən tarixi rekorda - İsveçə vurduğu və Avropanın danışdığı baxımlı qol - İDMAN.BİZ-in İCMALI

16 Noyabr 2026 15:57
53
San-Marino ilə debütdən tarixi rekorda - İsveçə vurduğu və Avropanın danışdığı baxımlı qol - İDMAN.BİZ-in İCMALI

Bu gün, noyabrın 16-da Azərbaycan milli komandası Andorra ilə yoldaşlıq görüşü keçirəcək. Qarşılaşma yığmamızın kapitanı Emin Mahmudov üçün xüsusi əhəmiyyət daşıyır. 34 yaşlı yarımmüdafiəçi on il şərəfini qoruduğu milli komandada karyerasını başa vurmağa qərar verib.

İdman.Biz xəbər verir ki, Eminin milli komandadakı yolu kifayət qədər maraqlı və çətin olub. İlk vaxtlar ehtiyatdan meydana daxil olan, uzun müddət qol həsrəti çəkən futbolçu sonradan kapitana, rekordçuya və Avropa futbolunda ən baxımlı qollardan birinin müəllifinə çevrilib.

Gözlənilən debüt

Emin Mahmudov 1992-ci ildə anadan olub. Onun futbolçu kimi formalaşmasının mühüm hissəsi Rusiyada keçib. Yarımmüdafiəçi bu ölkənin yeniyetmə və gənclərdən ibarət yığmalarında çıxış edib.

2016-cı ilin avqustunda FIFA Mahmudovun Azərbaycan milli komandasında oynamasına icazə verib.

Futbolçunun debütü həmin il sentyabrın 4-də baş tutub. DÇ-2018-in seçmə mərhələsində San-Marino ilə səfər görüşündə Mahmudov 78-ci dəqiqədə meydana daxil olub. Azərbaycan Ruslan Qurbanovun qolu sayəsində 1:0 hesablı qələbə qazanıb.

Lakin Emin dərhal millinin əsas heyət üzvünə çevrilə bilməyib. O, 2016-cı ildə cəmi iki matç keçirib. Növbəti dəfə yığmanın formasını isə yalnız 2018-ci ilin martında geyinib.

İlk qol və inanılmaz 2021-ci il

Mahmudov millidə ilk qolunu 2018-ci il iyunun 9-da Latviya ilə yoldaşlıq görüşündə vurub.

Riqada keçirilən qarşılaşmada Azərbaycan 3:1 hesabı ilə qalib gəlib, Emin isə 63-cü dəqiqədə fərqlənib.

Maraqlıdır ki, yarımmüdafiəçi növbəti qolunu vurmaq üçün təxminən üç il gözləməli olub.

Onun milli karyerasında əsl dönüş nöqtəsi 2021-ci ilə təsadüf edib.

Həmin il Mahmudov 12 qarşılaşmada yeddi qol vuraraq Azərbaycan millisinin bir təqvim ili ərzində ən çox fərqlənmiş futbolçusuna çevrilib.

O, Serbiya, Türkiyə, Lüksemburq və İrlandiyanın qapısına yol tapıb, Qətərlə 2:2 hesabı ilə başa çatan yoldaşlıq görüşündə isə dubl edib.

Yeddi qoldan dördü DÇ-2022-nin seçmə mərhələsində vurulub.

Məhz həmin dövrdə Mahmudov yalnız komandanın oyununu quran yarımmüdafiəçi kimi deyil, həm də yığmanın əsas qol ümidlərindən biri kimi tanınmağa başlayıb.

Avropanın danışdığı İsveç qolu

Emin Mahmudovun milli karyerasının ən yaddaqalan günlərindən biri 2023-cü il noyabrın 16-sıdır.

Həmin tarixdə Azərbaycan AVRO-2024-ün seçmə mərhələsində İsveçi 3:0 hesabı ilə məğlub edib.

Mahmudov görüşün 3-cü dəqiqəsində hesabı açıb, 89-cu dəqiqədə isə ölkə hüdudlarından kənarda da böyük maraq doğuran möhtəşəm qola imza atıb.

İsveç millisinin qapıçısı Robin Olsenin irəli çıxdığını görən kapitan mərkəz xəttinə yaxın məsafədən uzaqdan zərbə endirib. Top qapıçının üzərindən keçərək tora daxil olub.

Bu qol beynəlxalq səviyyədə də yüksək qiymətləndirilib.

UEFA-nın texniki müşahidəçiləri Mahmudovun zərbəsini AVRO-2024-ün bütün seçmə mərhələsinin ən yaxşı on qolu arasında ikinci yerə layiq görüblər.

Birinci pillədə Lixtenşteyn millisinin futbolçusu Sandro Volfingerin Bosniya və Herseqovinaya vurduğu qol qərarlaşıb.

Mahmudovun qolu UEFA-nın seçimində Kilian Mbappe və Bukayo Saka kimi ulduzların qollarını da geridə qoyub.

Azərbaycan futbolçusunun belə mötəbər siyahıda ikinci olması milli futbolumuz üçün xüsusi hadisə idi.

Qurban Qurbanovun rekordu necə yeniləndi?

Azərbaycan millisinin ən yaxşı bombardiri adı uzun illər Qurban Qurbanova məxsus olub.

1992–2005-ci illərdə yığmamızda 68 oyun keçirən sabiq hücumçu 14 qol vurub. O, sonuncu dəfə 2004-cü ildə Latviya ilə görüşdə fərqlənib.

2024-cü il iyunun 11-də Mahmudov bu göstəricini təkrarlayıb.

Azərbaycanın Qazaxıstanı 3:2 hesabı ilə məğlub etdiyi yoldaşlıq oyununda Emin millidə 14-cü qolunu vuraraq Qurbanovla eyni göstəriciyə çatıb.

Tarixi rekord isə 2025-ci il sentyabrın 9-da yenilənib.

Həmin gün Azərbaycan DÇ-2026-nın seçmə mərhələsində Bakıda Ukraynanı qəbul edib. Mahmudov 72-ci dəqiqədə penaltidən fərqlənərək hesabı bərabərləşdirib - 1:1.

Bu, onun yığmadakı 15-ci qolu olub.

Üstəlik, Emin həmin göstəriciyə millidə keçirdiyi 56-cı oyunda çatıb. Beləliklə, o, Qurban Qurbanovun 21 il ərzində yenilənməyən rekordunu qırıb.

Mahmudov qarşılaşmadan sonra uzun müddət milli komandanın ən yaxşı bombardiri olmaq üçün çalışdığını etiraf edib, bu uğurda komanda yoldaşlarının əməyini xüsusi vurğulayıb.

On altıncı qol və son statistika

Emin Mahmudovun milli komandada hələlik sonuncu qolu 2026-cı il martın 27-də qeydə alınıb.

Sumqayıtda FIFA Series turniri çərçivəsində Sent Lüsiya ilə keçirilən oyunun 2-ci dəqiqəsində kapitan penaltini dəqiq yerinə yetirərək hesabı açıb. Azərbaycan həmin görüşdə 6:1 hesablı qələbə qazanıb.

Beləliklə, Andorra ilə vida matçı ərəfəsində Mahmudovun hesabında 65 oyun və 16 qol var.

O, orta hesabla hər dörd qarşılaşmadan birində fərqlənib. Mərkəz yarımmüdafiəçisi üçün bu, kifayət qədər yüksək göstəricidir.

Üstəlik, həmin 16 qoldan yeddisi yalnız 2021-ci ildə vurulub.

Mahmudov milli komandada ən çox oyun keçirən futbolçu deyil. Bu rekord 111 qarşılaşma ilə Rəşad Sadıqova məxsusdur.

Lakin Emin yığmanın tarixində ən məhsuldar futbolçu kimi adını Azərbaycan futbolunun salnaməsinə yazdırıb.

Milli forma ilə son dəqiqələr

Andorra matçından əvvəl Mahmudovun millidəki son oyunu 2026-cı il oktyabrın 1-də Lixtenşteynə qarşı Millətlər Liqası görüşü olub. Start heyətində meydana çıxan yarımmüdafiəçi 0:0 hesablı qarşılaşmada iştirak edib.

Noyabrın 13-də Lixtenşteyn üzərində qazanılan 1:0 hesablı qələbə zamanı isə o, ehtiyat oyunçular skamyasında qalıb.

İndi milli karyerasının sonuncu səhifəsinin Andorra ilə yoldaşlıq görüşündə yazılması gözlənilir. Qarşılaşma bu gün Bakı vaxtı ilə saat 22:00-da başlayacaq.

Oyunöncəsi mətbuat konfransında Mahmudov son matçında bütün qüvvəsini ortaya qoyacağını və yadda qalan çıxış etmək istədiyini bildirib.

Baş məşqçi Ayxan Abbasov isə Eminin milli komandanın tarixində iz qoyduğunu, yığmanın qələbələrində mühüm rol oynadığını vurğulayıb. Mütəxəssis komandanın kapitanı üçün qalib gəlməyə çalışacağını açıqlayıb.

Bununla belə, Mahmudov futbolçu karyerasını tam başa vurmur. O, klub səviyyəsində çıxışını davam etdirəcək.

Tarixlərin maraqlı təsadüfü də diqqət çəkir. Düz üç il əvvəl - 2023-cü il noyabrın 16-da Emin İsveçin qapısına unudulmaz qol vurmuşdu. İndi, 2026-cı il noyabrın 16-da isə Azərbaycan millisinin ən yaxşı bombardiri kimi yığma ilə vidalaşır.

On il ərzində milli komandada baş məşqçilər, futbolçu nəsilləri, nəticələr və azarkeşlərin gözləntiləri dəyişib. Mahmudov isə Azərbaycan futbolunun tarixində özünəməxsus yer tutmağı bacarıb.

İndi əsas sual budur: onun 16 qolluq rekordunu kim və nə vaxt yeniləyə biləcək?

İdman.Biz