Kişi tennisçilərin ATP reytinqində gələn həftə ciddi dəyişikliklər baş verə bilər. Dünya birincisi Yannik Sinner əvvəlki turnirlərdə qazandığı xalların silinməsi nəticəsində liderliyi itirmək təhlükəsi ilə üzləşib.
İdman.Biz “Tennis365”ə istinadən xəbər verir ki, oktyabrın 26-dan etibarən tennisçilərin ötən il Vyana, Bazel və Paris turnirlərində qazandıqları reytinq xalları hesabdan çıxarılacaq.
ATP reytinqi son 52 həftə ərzində toplanan xallar əsasında formalaşdırılır. Buna görə tennisçilər əvvəlki mövsümün müvafiq dövründə qazandıqları xalları qorumaq üçün yenidən uğurlu çıxış etməlidirlər.
Ən böyük itki Yannik Sinneri gözləyir. İtaliyalı tennisçi 2025-ci ildə Vyana turnirinin qalibi kimi 500, Paris Masters yarışının çempionu kimi isə 1000 xal əldə edib. Beləliklə, onun hesabından ümumilikdə 1500 xal silinəcək.
Hazırda 10 950 xalla reytinqə başçılıq edən Sinnerin göstəricisi 9450 xala enə bilər. Dizindəki zədə səbəbindən mövsümü vaxtından əvvəl başa vuran italiyalı tennisçi həmin xalları qorumaq imkanından məhrumdur.
Bu vəziyyət Aleksandr Zverev üçün dünya reytinqində liderliyə yüksəlmək şansı yaradır. Almaniyalı tennisçi hazırda 10 070 xalla ikinci pillədə qərarlaşıb. Onun hesabından 730 xal silinəcək. Zverev ötən il Vyanada finala, Parisdə isə yarımfinala yüksəlib.
Almaniyalı idmançı noyabrın 2-də açıqlanacaq reytinqdə birinci pilləyə qalxa bilər. Bunun üçün Vyana turnirindəki nəticəsi mühüm əhəmiyyət daşıyacaq.
Karlos Alkaras isə rəqibləri ilə müqayisədə daha əlverişli vəziyyətdədir. İspaniyalı tennisçi cəmi 10 xal itirəcək. Bu da onun ilk iki pillədə qərarlaşan idmançılarla xal fərqini azaltmasına imkan verə bilər.
Ben Şelton və Daniil Medvedevin hər biri 250, Feliks Oje-Alyassimin isə 750 xal itirməsi gözlənilir. Kanadalı tennisçi ilk onluqdan kənarda qalmaq təhlükəsi ilə üzləşib.
Aleks de Minaurun hesabından 400, Flavio Kobollinin isə 100 xal silinəcək.
Novak Cokoviç üçün isə vəziyyət fərqlidir. Serbiyalı tennisçi ötən il Vyana, Bazel və Paris turnirlərində iştirak etmədiyindən xal itkisi yaşamayacaq.
Hazırda dünya reytinqində 12-ci pillədə qərarlaşan Cokoviç Bazeldə keçiriləcək ATP 500 turnirinə qatılacaq. Onun Paris Masters yarışında da iştirak etməsi nəzərdə tutulur.
Serbiyalı tennisçi uğurlu nəticələr sayəsində ATP-nin mövsümün yekun turnirinə vəsiqə qazanmaq şansını artıra bilər.
Qeyd edək ki, oktyabrın 25-nə olan canlı ATP reytinqində ilk üç pilləni Yannik Sinner (10 950 xal), Aleksandr Zverev (10 070 xal) və Karlos Alkaras (5610 xal) tuturlar.
