"Rəqiblərdən asılı olmayaraq, Qurban Qurbanovun komandasının tam şəkildə hazır olacağına və hər oyunda azarkeşlərini sevindirməyə çalışacağına inanıram".
İdman.biz xəbər verir ki, bunu Teleqraf-a açıqlamasında AFFA Məşqçilər Komitəsinin sədri Vaqif Sadıqov "Qarabağ"ın UEFA Çempionlar Liqasındakı rəqiblərini dəyərləndirərkən deyib.
Sadıqovun fikrincə, TOP-5 liqa təmsilçilərinə qarşı keçiriləcək oyunlar çətin olacaq: "Rəqiblərdən bizə artıq tanış olanlar da var. "Çelsi", "Liverpul", "Napoli" ilə çətin oyunlarımız olacaq. Bu, həm məsuliyyətli, həm də şərəfli turnirdir. Bu oyunlarda "Qarabağ" öz simasını itirməmək şərtilə sona qədər mübarizə aparacaq. Bakıya gələcək komandaların hamısı ilə əvvəllər də qarşılaşmışıq. Buradan qələbə ilə dönən də olub, məğlub olan da. Ötən mövsüm "Ayaks"a UEFA Konfrans Liqasının əsas mərhələsində məğlub olsaq da (0:3 - red.), onlardan qat-qat yaxşı oynamışdıq".
O, "Qarabağ"ın müdrik komanda olduğunu söyləyib: "Hesab edirəm ki, hazırda tam fərqli bir "Qarabağ" komandası görürük. Artıq təkcə meydanda deyil, həm də tablodakı nəticə də "Qarabağ"ın oyununa uyğundur. İnanıram ki, rəqibdən asılı olmayaraq, azarkeşlərin dəstəyi ilə qələbəyə köklənən kollektiv görəcəyik. Rəqibləri ayırmaq istəməzdim. "Kopenhagen"i daha əvvəl məğlub etmişik, amma artıq xeyli vaxt keçib və həm onlar, həm də "Qarabağ" çox dəyişib. İnanıram ki, bizi maraqlı oyunlar gözləyəcək. Ev oyunlarından başlayaraq, xal qazanacağımıza inanıram".
Vaqir Sadıqov “köhlən atlar”ın mümkün transferləri barədə də söz açıb: “Düşünürəm ki, yeni futbolçular gələcəksə, komandaya uyğunlaşmaq üçün zamana ehtiyacları olacaq. Hamı yeni hücumçunun transferini istəyir, amma Nəriman Axundzadə özünü yaxşı tərəfdən göstərə bildi. Onunla rəqabət apara biləcək bir oyunçu transfer edilməlidir, lakin bizə Nərimanın daha çox oynaması lazımdır. O, formada qalmalıdır ki, qarşıdakı oyunlarda milli komandaya kömək edə bilsin".
Qeyd edək ki, “Qarabağ” UEFA Çempionlar Liqasının əsas mərhələsində “Liverpul” (İngiltərə), “Benfika” (Portuqaliya), “Napoli” (İtaliya) və “Atletik”lə (İspaniya) səfərdə, “Çelsi” (İngiltərə), “Ayntraxt” (Almaniya), “Ayaks” (Niderland) və “Kopenhagen”lə (Danimarka) evdə qarşılaşacaq.
İdman.biz
