Moskva “Dinamo”sunun və SSRİ millisinin sabiq qapıçısı Aleksandr Uvarov 1988-ci ildə “Neftçi” ilə oyundan sonra baş verdiyini iddia etdiyi müəmmalı hadisənin təfərrüatlarını açıqlayıb. O, Bakı təmsilçisi ilə qarşılaşma zamanı İsgəndər Cavadovla toqquşmasını, həmçinin matçdan sonra oteldə eşitdiyi və mümkün rüşvət cəhdi ilə əlaqələndirdiyi söhbəti xatırlayıb.
İdman.Biz-in məlumatına görə, Uvarov bu barədə “Sport-Ekspress”ə müsahibəsində danışıb.
Onun sözlərinə görə, “Neftçi” ilə qarşılaşma Moskva klubu üçün böyük əhəmiyyət daşıyıb. Əsas qapıçı Dmitri Xarinin hansı səbəbdən Bakıya gəlmədiyini bilməyən Uvarov həmin oyunda qapını qorumaq şansı qazanıb.
Sabiq futbolçu bildirib ki, qarşılaşma zamanı qapıdan çıxışlarının birində İsgəndər Cavadovla toqquşub. Ayağına dəyən zərbə o qədər güclü olub ki, qalan vaxtı böyük çətinliklə oynayıb. Buna baxmayaraq, Uvarov qapısını toxunulmaz saxlamağı bacarıb, “Dinamo” isə 1:0 hesabı ilə qalib gəlib.
Lakin qapıçının diqqətini çəkən əsas hadisə matçdan sonra baş verib. Futbolçular “İnturist” otelinə qayıdarkən Uvarov liftlərin yanında əyləşən iki naməlum şəxsi görüb.
“İnturist”ə qayıdırıq. Liftlərin yanında masalar var, iki qəribə adam oturub. Ayaqlarının yanında diplomatı xatırladan çanta var. Eşidirəm ki, məni göstərərək deyirlər: “Pulu ona vermək lazım idi”. Dərhal düşündüm: “Bu nə məsələdir belə?” - deyə Uvarov söyləyib.
Sabiq qapıçının sözlərinə görə, həmin vaxt belə məsələlərdə kifayət qədər sadəlövh olub və eşitdiyi sözlərin mümkün mənasını dərhal anlamayıb.
Maraqlıdır ki, Uvarov bu hadisə barədə 2022-ci ilin avqustunda “Matç TV”yə müsahibəsində də danışıb. Lakin həmin vaxt naməlum şəxslərin sözlərini bir qədər fərqli çatdırıb: “Pulu səhv adama vermişik”.
O zaman Uvarov Moskva “Dinamo”sundakı komanda yoldaşlarından birinin mümkün rüşvət cəhdinin hədəfi ola biləcəyini ehtimal edib. Yeni müsahibədə isə əlavə detallar açıqlanıb: iki naməlum şəxs, onların ayaqları yanındakı diplomat çanta və söhbət zamanı birbaşa Uvarova işarə edilməsi.
Qeyd edək ki, “Neftçi” ilə “Dinamo” arasındakı qarşılaşma 1988-ci il SSRİ çempionatının son mərhələsində keçirilib. Həmin vaxt Bakı klubu yüksək liqada qalmaq uğrunda mübarizə aparırdı və xallara ciddi ehtiyacı var idi. Buna baxmayaraq, Moskva təmsilçisi İqor Dobrovolskinin 34-cü dəqiqədə penaltidən vurduğu qol sayəsində 1:0 hesablı qələbə qazanıb.
Mövsümün yekununda “Neftçi” 16 komanda arasında 15-ci yeri tutaraq SSRİ çempionatının yüksək liqasını tərk edib.
Qeyd: Uvarovun danışdıqları mümkün rüşvət cəhdi ilə bağlı şübhə yaratsa da, təqdim olunan məlumatlarda belə bir cəhdin həqiqətən baş verdiyini və ya konkret futbolçuya pul təklif edildiyini təsdiqləyən sübut yoxdur.
