Polşanın “Weszło” idman nəşri Azərbaycan millisinin hücumçusu Mahir Emreliyə həsr olunmuş ayrıca məqalə dərc edib. Nəşr futbolçunun Polşa çempionatındakı çıxışları ilə bağlı qeyri-adi statistikaya diqqət çəkib.
İdman.Biz xəbər verir ki, məqalə “Emrelinin şokedici statistikası: oyunların 80 faizindən çoxunda məğlubiyyət” başlığı ilə yayımlanıb.
Jurnalistlərin hesablamalarına görə, azərbaycanlı futbolçu Polşa Ekstraklasasında “Legiya” və “Rakuv”un heyətində ümumilikdə 25 oyunda meydana çıxıb və bu qarşılaşmaların 21-də komandası məğlub olub. Beləliklə, Emrelinin iştirak etdiyi matçların 84 faizi onun komandaları üçün uğursuz nəticələnib.
2021/2022 mövsümündə Emreli Varşavanın “Legiya” klubunda 15 oyunda iştirak edib. Bu qarşılaşmaların 12-də komanda məğlub olub, yalnız üçündə qələbə qazanıb.
Hücumçunun ötən yay Polşaya qayıtmasından sonra da vəziyyət yaxşılaşmayıb. Emreli “Rakuv”un heyətində cari çempionatın keçirdiyi ilk 10 oyunun hamısında meydana çıxıb və bu qarşılaşmaların doqquzunda məğlubiyyətlə üzləşib. Çenstoxova təmsilçisinin yeganə qələbəsi “Motor” üzərində 2:1 hesablı nəticə olub. Həmin görüşdə Emreli komandasının qollarında birbaşa iştirak etməyib.
Bununla belə, Polşa nəşri maraqlı bir ziddiyyətə diqqət çəkib: komandanın nəticələri uğursuz olsa da, azərbaycanlı futbolçunun fərdi göstəriciləri xeyli yaxşılaşıb. Emreli “Rakuv”un heyətində 10 oyunda üç qol vurub və bir məhsuldar ötürmə verib. Bununla da o, Polşa çempionatında “Legiya”da çıxış etdiyi bütün dövr ərzindəki göstəricilərini üstələyib.
Məqalədə Emrelinin Polşadakı ilk çıxış mərhələsinin qalmaqallı şəkildə başa çatması da xatırladılıb. 2021-ci ilin dekabrında “Legiya”nın Plotsk “Visla”sına məğlubiyyətindən sonra Varşava klubunun aqressiv azarkeşləri komandanın avtobusuna hücum ediblər. Hadisə zamanı Azərbaycan millisinin hücumçusunun başına zərbə dəyib. Bundan qısa müddət sonra futbolçu Polşanı tərk edərək karyerasını Zaqreb “Dinamo”sunda davam etdirib.
Qeyd edək ki, məqalənin dərc olunmasına “Rakuv”un çempionatın 10-cu turunda növbəti məğlubiyyəti səbəb olub. Komanda öz meydanında GKS “Katovitse”yə 1:4 hesabı ilə uduzub. Emreli matça start heyətində başlayıb, lakin 61-ci dəqiqədə əvəzlənib.
Diqqətçəkən məqam odur ki, “Rakuv” 10 turdan sonra artıq doqquz məğlubiyyət alıb. Bununla da komanda əvvəlki mövsümün göstəricisini, demək olar ki, təkrarlayıb. Çenstoxova təmsilçisi ötən çempionatda ümumilikdə 11 dəfə məğlub olub.
Beləliklə, Mahir Emreli Polşa Ekstraklasasında keçirdiyi 25 oyunda cəmi dörd qələbə sevinci yaşayıb. Bununla belə, söhbət məhz azərbaycanlı hücumçunun iştirak etdiyi qarşılaşmalarda komandalarının nəticələrindən gedir. Bu statistika məğlubiyyətlərə görə şəxsi məsuliyyətin birbaşa Emrelinin üzərinə düşdüyü anlamına gəlmir.
