Beynəlxalq Futbol Assosiasiyaları Federasiyası (FIFA) 2026-cı il dünya çempionatının yekunlarına dair geniş texniki hesabat dərc edib. Araşdırmada turnirin bütün 104 matçı təhlil olunub.
İdman.Biz xəbər verir ki, tədqiqatı FIFA-nın Texniki Tədqiqat Qrupu və Futbol Effektivliyinin Təhlili Departamenti hazırlayıb. Mütəxəssislər ekspert müşahidələrini futbolçuların və topun hərəkətinə dair məlumatlarla, həmçinin ətraflı videoanalizlə birləşdiriblər.
FIFA müasir futbolun əsas tendensiyalarından biri kimi əks-pressinqi göstərib. Güclü komandalar topu itirdikdən sonra onu sadəcə geri qaytarmağa deyil, rəqib hələ yenidən qurulmağa imkan tapmamış bu anı yeni hücumun başlanğıcına çevirməyə getdikcə daha çox çalışırlar. Dünya çempionu olan İspaniya millisi bu prinsipdən xüsusilə effektiv istifadə edib.
Bununla yanaşı, təhlil göstərib ki, müasir futbolda uğurun universal formulu yoxdur. Bəzi komandalar yüksək və aqressiv pressinqə, digərləri isə kompakt aşağı müdafiə blokuna və müdafiədən hücuma sürətli keçidlərə üstünlük verib. FIFA nümunə kimi Kabo-Verdeni göstərib. Bu komanda oyun intizamı və kompaktlığı sayəsində texniki baxımdan daha güclü rəqiblərə uğurla müqavimət göstərə bilib.
Digər diqqətçəkən tendensiya qapıçıların rolu ilə bağlıdır. Qolkiper getdikcə yalnız müdafiənin sonuncu səddi kimi deyil, hücumların qurulmasında tamhüquqlu iştirakçı kimi nəzərdən keçirilir. Komandalar topa sahibolmanın ilk mərhələsində say üstünlüyü yaratmaq və pressinqdən çıxmaq üçün qapıçıdan istifadə edirlər.
Hesabatda ilk xəttdə üç futbolçu ilə oynamaq, cinahlarda rotasiyalar, mərkəzlə cinah arasındakı daxili kanallardan istifadə, əsas oyunçular vasitəsilə topun irəlilədilməsi, yüksək pressinq, müdafiə blokları və hücuma sürətli keçidlərə də xüsusi diqqət yetirilib.
FIFA-nın təhlili həmçinin göstərir ki, topa sahibolmanın dəyişməsindən sonrakı ilk saniyələrdə komandanın reaksiyası getdikcə daha böyük əhəmiyyət daşıyır. Bu, həm topun itirilməsindən, həm də qazanılmasından sonrakı vəziyyətə aiddir.
Araşdırmada FIFA-nın genişləndirilmiş məlumatlarından istifadə olunub. Bu məlumatlara yalnız ənənəvi statistika deyil, həm də futbolçuların meydandakı mövqeləri, hərəkətləri, qarşılıqlı əlaqələri və müxtəlif oyun mərhələlərinin strukturu daxil edilib. Əldə olunan nəticələr futbolun inkişafındakı uzunmüddətli dəyişiklikləri müəyyənləşdirmək üçün əvvəlki turnirlərlə də müqayisə olunub.
