“Karvan-Yevlax” Premyer Liqanın 3-cü turu çərçivəsində “Qarabağ”a 0:2 hesabı ilə məğlub olub.
İdman.biz xəbər verir ki, Yevlax təmsilçisinin baş məşqçisi Azər Həşimov oyunla bağlı fikirlərini bölüşüb.
O, hər növbəti matçda daha da yaxşı oynamağa çalışdıqlarını deyib: "Üçüncü oyunumuzdur. Hər görüşdən sonra öz oyunumuzu təhlil edirik, daha da yaxşı olmağa çalışırıq. Yevlaxdan gələrək, bizə dəstək olan azarkeşlərə də təşəkkür edirəm. Bizi tək qoymurlar. “Qarabağ”ın çox güclü olması hamıya bəllidir. Döyüşkən mübarizə apardıq. Birinci hissədə də iki qol imkanımız var idi. İkinci hissədə isə “Qarabağ” 2-ci qolu vurdu, qalib gəldi. “Qarabağ”a çempionatda və ÇL-də uğurlar arzulayıram.
Oyundan öncə futbolçularla danışmışdıq. “Qarabağ”a qarşı oynamağın özü elə futbolçular üçün motivasiyadır. “Qarabağ” Azərbaycanın fəxridir. Hər bir futbolçu istəyər ki, “Qarabağ”a qarşı daha yaxşı oynayıb, özünü yaxşı tərəfdən göstərsin. Futbolçularıma aşılayırıq ki, heç bir rəqibdən çəkinmək lazım deyil. Rəqibə hörmətlə yanaşmaq lazımdır, amma adlar önəmli deyil, önəmli olan komandadır. Məğlub olsaq da, uşaqlar sona qədər mübarizə apardı.
Yenə də fikrimiz Premyer Liqada qalmaq və daha yaxşı olmağa can atmaqdır. Birinci oyundan sonra da demişdim ki, heç bir komandaya asanlıqla uduzmayacağıq. Çünki futbolçuların işə yanaşmasını da görürük. Biz də məşqçi olaraq, oyunları analiz edirik. Daha yaxşı olmağa, yaxşı komanda formalaşadırmağa çalışırıq. İstəyirik ki, komandamız döyüşkən, mübariz futbol oynasın və bizi sevən azarkeşləri sevindirək”.
İdman.biz
