"Çox çətin oyun oldu. Hər iki tərəf qələbə qazana bilərdi. Birinci hissədə yaxşı oynasaq da, ikinci yarıda işlər mənim istədiyim kimi getmədi".
İdman.biz xəbər verir ki, bunu "Sumqayıt"ın baş məşqçisi Saşa İliç Misli Premyer Liqasının II turunda "Şamaxı" ilə 1:1 hesablı heç-heçədən sonra keçirilən mətbuat konfransında deyib.
- İlk iki turda qapısında qol görməyən "Sumqayıt" bu gün müdafiədə inamsız görünürdü. Bunun səbəbi nədir?
- Bəzən olur ki, yaxşı müdafiə də qol buraxır. Bu gün də adi bir vəziyyətdə qapımızda qol gördük. İkinci hissədə problemlərimiz oldu. Bu da uzun ötürmələrlə bağlı idi. Top ünvana çatmırdı.
- Milli fasilə işinizə yarayacaq?
- Əslində fasilənin yaranması bizim xeyrimizədir. Çünki, "Qarabağ"la matçda oyunçular yorulmuşdu. Qələbə seriyamız bitsə də, bu fasilə bizə lazım idi.
- 3 turdan sonra 7 xal toplamaq necədir?
- "Qarabağ"ın da rəqiblər arasında olmasını nəzərə alsaq, yaxşı nəticədir. Bu, hələ çempionatın əvvəlidir. Ancaq növbəti oyunu fikirləşirik.
- Azərbaycan Premyer Liqasının səviyyəsi ilə bağlı fikirləriniz necədir?
- Fikir bildirmək üçün vaxt lazımdır. "Qarabağ" Azərbaycanın ən güclü komandasıdır. Çempionlar Liqasının Liqa mərhələsinə vəsiqə qazanmaqla da bunu sübut etdilər. Hər oyunun çətin olacağını düşünürəm.
İdman.biz
