İspaniyanın "Real" klubunun hücumçusu Kilian Mbappenin Madrid təmsilçisinə keçidindən sonra "Barselona"ya qarşı oyunlardakı statistikası diqqət çəkir.
İdman.Biz xəbər verir ki, fransalı forvard katalon klubu ilə keçirdiyi altı "El-Klassiko"nun beşində məğlubiyyətlə üzləşib. Sonuncu belə nəticə İspaniya Superkubokunun finalında qeydə alınıb - "Barselona" 3:2 hesabı ilə qalib gəlib.
Mbappe həmin oyuna ehtiyat oyunçular skamyasında başlayıb və 76-cı dəqiqədə ispaniyalı Qonsalo Qarsiyanı əvəzləyərək meydana daxil olub. O, turnirin yarımfinalını isə zədə səbəbindən buraxmışdı.
Xatırladaq ki, Kilian Mbappe 2024-cü ilin yayında Fransanın PSJ klubundan "Real"a transfer olunub. Cari mövsümdə hücumçunun aktivində 24 oyunda 29 qol və beş məhsuldar ötürmə var.
