“Neçə vaxtdır yeni stadionumuzun hazır olmasını gözləyirdik. Sevinirik ki, növbəti oyunumuzu öz doğma meydanımızda, azarkeşlərimizin önündə oynayacağıq”.
Bunu Misli Premyer Liqasının XII turunda Yevlaxda “Kəpəz”i qəbul edəcək “Karvan-Yevlax”ın hücumçusu Uğur Cahangirov deyib.
Cari mövsümdə ilk dəfə evdə mübarizə aparacaq debütantın futbolçusu əlavə edib:
“Bildiyiniz kimi, 11 turdur səfərdə oynayırdıq və bunun çətinliyini çəkirdik. Hətta deyərdim ki, biz öz meydanımızda oynasaydıq, bu gün 5 deyil daha çox xal toplaya bilərdik. Oyuna tam ciddi və motivasyali şəkildə hazırlaşırıq. Komandada əhval-ruhiyyə yaxşı səviyyədədir. İnanırıq ki, “Kəpəz”lə oyunda 3 xalı götürən tərəf biz olacağıq”, - deyə fanat.az-a açıqlamasında deyib.
