Azərbaycan Respublikası Gənclər və İdman Nazirliyi və Azərbaycan Velosiped Federasiyasının birgə təşkilatçılığı ilə trek velosipedi üzrə mövsümün bağlanış yarışı keçirilib.
İdman.biz-in məlumatına görə, oktyabrın 21-22-də Respublika Velotrekində baş tutan yarışda 2006-cı il və daha böyük (15 nəfər), 2007-2009-cu illər (52 nəfər), 2010-2011-ci illər (24 nəfər) təvəllüdlü oğlanlar, həmçinin bütün yaş kateqoriyalarında qadınlar (11 nəfər) iştirak ediblər.
Turnirin birinci günündə idmançılar QİT-200 m, ikinci günündə isə 2006-cı il təvəllüdlü və daha böyük oğlanlar QİT-1000 m, digər bütün velosipedçilər QİT-500 m növündə mübarizə aparıblar.
Beynəlxalq Velosipedçilər İttifaqının (UCI) mövcud qaydalarına əsasən təşkil edilən yarışın nəticələrinə görə, QİT-200 m növü üzrə 2006-cı il təvəllüdlü və daha böyük oğlanlar arasında Nofəl Nuriyev (ROEQİUGVM, 11.94), 2007-2009-cu illər təvəllüdlü oğlanların mübarizəsində Ravi Rzayev (ROEQİUGVM, 12.39), 2010-2011-ci illər təvəllüdlü oğlanların yarışında Ümid İsmayılov (ROEQİUGVM, 14.77), qadınlar arasında isə Lalə Əbdürəhmanova (ROEQİUGVM, 15.15) ən yaxşı göstəricilərə imza ataraq birinci yerə layiq görülüblər.
QİT-500 m növü üzrə 2007-2009-cu illər təvəllüdlü oğlanların mübarizəsində yenidən Ravi Rzayev (ROEQİUGVM, 38.13), 2010-2011-ci illər təvəllüdlü oğlanlar arasında Mirzə Qəmbərov (ROEQİUGVM, 45.00), qadınların yarışında isə İradə Əbdürəhmanova (Təhsil RİM, 45.34) bütün rəqiblərindən üstün olaraq fəxri kürsünün ən yüksək pilləsinə qalxıblar.
QİT-1000 m növündə mübarizə aparan 2006-cı il təvəllüdlü və daha böyük oğlanlar arasında isə Tural İsrafilov (ROEQİUGVM, 1.14.91) birincilik sevinci yaşayıb.
Qeyd edək ki, yarışdan sonra mükafatlandırma mərasimi keçirilib. Qaliblərə medal, diplom və qiymətli hədiyyələr təqdim edilib.
İdman.biz
