Ölkə Prezidenti İlham Əliyevin qərarı ilə mənzillə təmin olunanlar arasında güləşçi qadınlardan ibarət yığmamızın məşqçisi Solmaz Adilova da yer alıb.
Bu münasibətlə İdman.Biz Solmaz Adilovadan açıqlama alıb.
“Siz təsəvvür belə edə bilməzsiniz, nə qədər xoşbəxtəm! Bu xəbəri eşidəndə sevincdən o qədər ağladım ki! Axı artıq səkkiz ildir kirayədə yaşayıram — böyük idmandan ayrılıb məşqçilik karyerasına başladığımdan bəri. İdmançı olduğum vaxtlar yığmaların təlim-məşq toplanışlarında qalırdım, amma sonradan çox çətin oldu. Mənzil təmirsiz olsa da, artıq özümə məxsus 67 kvadratmetr yaşayış sahəm var! Təmir isə zamanla ediləcək bir məsələdir. Bu cür qayğıya görə həm Azərbaycan Güləş Federasiyasına, həm də cənab Prezidentə idmançılara göstərilən diqqət və dəstəyə görə çox minnətdaram”, - deyə Solmaz Adilova bildirib.
