“Real Madrid”in baş məşqçisi Joze Mourinyo komandanın daxilində münasibətlərin yaxşılaşdırılmasına xüsusi diqqət yetirir. Portuqaliyalı mütəxəssisin futbolçularla ünsiyyət tərzi soyunub-geyinmə otağındakı ab-havaya müsbət təsir göstərir.
İdman.Biz Marca nəşrinə istinadən xəbər verir ki, Mourinyo Xabi Alonso və Alvaro Arbeloanın rəhbərliyi dövründə futbolçularla məşqçilər korpusu arasında yaranmış gərginlikdən sonra komandada daha sağlam münasibətlər qurmağa çalışır.
Məlumata görə, təcrübəli mütəxəssis futbolçuların fərdi xüsusiyyətlərini nəzərə alır və hər biri ilə uyğun ünsiyyət forması seçir. O, məşqlərdən sonra oyunçularla söhbət edir, zarafatlaşır və onlarla daha yaxın münasibət qurmağa vaxt ayırır.
Komandanın aparıcı futbolçuları Mourinyonun bu yanaşmasından razıdırlar. Baş məşqçinin nüfuzu və təcrübəsi ilə yanaşı, fərqli xarakterə malik oyunçularla dil tapmaq bacarığı da kollektivdə müsbət qarşılanır.
Bildirilir ki, Alonso və Arbeloanın rəhbərliyi dövründə bəzi futbolçularla məşqçilər arasında fikir ayrılıqları yaşanıb. Mourinyo isə nizam-intizamı qorumaqla yanaşı, oyunçularla qarşılıqlı etimadı gücləndirməyə çalışır.
Bununla belə, mövsüm ərzində heyət seçimi, uğursuz nəticələr və əsas heyətdə yer uğrunda rəqabət komanda daxilindəki münasibətləri yenidən sınağa çəkə bilər.
