Almaniyanın “Bavariya” futbol komandası hücumçusu Harri Keynin 2026-cı ilin “Qızıl top” mükafatını qazanacağına ümid edir.
İdman.Biz Almaniyanın “Bild” nəşrinə istinadən xəbər verir ki, Münhen klubunun rəhbərliyi ingiltərəli futbolçunun bu dəfə mükafata sahib çıxmaq üçün ciddi şansa malik olduğunu düşünür.
Nəşrin “Bayern Insider” podkastında jurnalistlər Kristian Falk və Hayko Nidderer klub rəhbərliyinin Keynin qalib gəlmək ehtimalını niyə yüksək qiymətləndirdiyini müzakirə ediblər.
Məlumata görə, “Bavariya”da hücumçunun şanslarının vaxtilə Frank Riberi və Robert Levandovskinin mükafat uğrunda mübarizə apardıqları dövrlə müqayisədə daha yaxşı olduğu qənaətindədirlər.
Nəşrin başlığında Münhen təmsilçisinin Asiyadan veriləcək səslərə ümid bəslədiyi vurğulanır. Bununla belə, klubun bu hesablamasının detalları məqalənin abunəçilərə açıq hissəsində təqdim olunur.
Klub rəhbərliyi hesab edir ki, Keynin mümkün qələbəsi yalnız fərdi mükafat baxımından deyil, “Bavariya”nın beynəlxalq nüfuzu üçün də əhəmiyyətli olacaq. Belə uğurun gələcəkdə yeni ulduz futbolçuların komandaya cəlb edilməsinə kömək edə biləcəyi bildirilir.
Qeyd edək ki, “Qızıl top” mükafatının təqdimetmə mərasimi oktyabrın 26-da Londonda keçiriləcək. 33 yaşlı Keyn ötən mövsümdə həm “Bavariya”, həm də İngiltərə millisindəki çıxışına görə əsas namizədlərdən biri hesab olunur.
