İtaliya A Seriyasının yeddinci turunda “Frozinone” öz meydanında “Sassuolo”nu 4:2 hesabı ilə məğlub edib.
İdman.Biz xəbər verir ki, qarşılaşmanın əsas qəhrəmanı het-trikə imza atan Antonio Raymondo olub.
Hesab doqquzuncu dəqiqədə Cakomo Kalonun qolu ilə açılıb. Altı dəqiqə sonra Domeniko Berardi tarazlığı bərpa edib – 1:1.
Meydan sahibləri 26-cı və 30-cu dəqiqələrdə Raymondonun vurduğu qollarla hesabı 3:1-ə çatdırıblar. Lakin 37-ci dəqiqədə Kristian Torstvedt fərqi minimuma endirib.
İkinci hissədə də üstünlüyünü qoruyan “Frozinone” 57-ci dəqiqədə Raymondonun üçüncü qolu ilə yekun hesabı müəyyənləşdirib – 4:2.
Bu qələbə ilə xallarının sayını 13-ə çatdıran “Frozinone” turnir cədvəlində dördüncü pilləyə yüksəlib. “Sassuolo” isə səkkiz xalla 11-ci pillədə qərarlaşıb.
