“Mançester Yunayted” İngiltərə Premyer Liqasında “Tottenhem”lə keçirəcəyi ev oyunu öncəsi ciddi heyət problemləri ilə üzləşib.
İdman.Biz xəbər verir ki, komandanın baş məşqçisi Maykl Karrik Patrik Dorqu, Nussair Mazraui və Benyamin Şeşkonun qarşıdakı görüşdə iştirak etməyəcəyini təsdiqləyib.
Danimarka millisinin düşərgəsində zədələnən Dorqunun bir neçə həftə yaşıl meydanlardan uzaq qalacağı gözlənilir. Mazraui isə zədədən sonra bərpa prosesini davam etdirir.
Şeşkonun vəziyyəti daha çox narahatlıq doğurur. Sloveniyalı hücumçunun əvvəllər dörd ay oynamamasına səbəb olan baldır zədəsi yenidən özünü göstərib.
Bundan başqa, Kobbi Maynu, Markus Reşford və Amad Diallonun da görüşdə iştirakı sual altındadır. Onların oynayıb-oynamayacağına matçdan əvvəl qərar veriləcək.
Qeyd edək ki, “Mançester Yunayted” - “Tottenhem” qarşılaşması bu gün “Old Trafford” stadionunda keçiriləcək. Mançester təmsilçisi beş xalla turnir cədvəlində 12-ci, London klubu isə iki xalla sonuncu pillədə qərarlaşıb.
