Turan” Voleybol Klubunun prezidenti Həsən Zeynalov qadın və kişi voleybolu arasındakı fərqlərdən, “Turan Tovuz”un son məğlubiyyətindən və komandaya legioner oyunçuların cəlb olunması zamanı qarşılaşdıqları çətinliklərdən danışıb.
İdman.Biz-in Tovuza ezam olunmuş əməkdaşının məlumatına görə, Həsən Zeynalov bu fikirləri voleybol üzrə Çempionlar Liqasının ikinci təsnifat mərhələsinin oyunu öncəsi keçirilən mətbuat konfransında səsləndirib.
Klub prezidenti qadın voleybolunun daha baxımlı olduğunu düşündüyünü bildirib:
“Qadın voleybolu ilə kişi voleybolu arasında böyük fərq var. Kişi voleybolunda fiziki güc önəm daşıyır, qadın voleybolunda isə kombinasiyalar daha vacibdir. Buna görə də qadın voleybolu daha zərif və baxımlı görünür”.
Həsən Zeynalov Tovuzda doğulub böyüdüyünü və “Turan Tovuz”un oyunlarını yaxından izlədiyini də qeyd edib. O, komandanın son məğlubiyyətini uğursuzluq kimi dəyərləndirib və gələcək oyunlarda qələbə qazanacağına inandığını bildirib:
“Mən özüm Tovuzda doğulub böyümüşəm, daha sonra Bakıya köçmüşəm. “Turan Tovuz”un bütün oyunlarında iştirak etmişəm. Son məğlubiyyət uğursuzluq idi. İnanıram ki, komanda növbəti oyunlarda qələbə qazanacaq”.
Klub rəhbəri “Turan”ın heyətinə legioner voleybolçuların cəlb olunması prosesinin də asan keçmədiyini vurğulayıb. Onun sözlərinə görə, bu zaman gözlənilməz çətinliklərlə qarşılaşıblar:
“Bəli, çətin oldu. Gözləmədiyimiz çətinliklərlə qarşılaşdıq. Onlara müəyyən vədlər vermişdik. Legionerlər Azərbaycana gələndə isə ölkəmizin möhtəşəm yer olduğunu gördülər”.
