Azərbaycanlı bodibilderlər mövsümün ikinci yarısına başlayırlar.
İdman.Biz-in məlumatına görə, milli federasiya ölkə çempionatının oktyabrın 25-də ənənəvi məkanda - “Elektra Events Hall”da keçiriləcəyini elan edib.
Cəmi bir neçə gün sonra, oktyabrın 29-dan noyabrın 2-dək Azərbaycan millisi növbəti dəfə İspaniyanın Santa-Susanna şəhərində təşkil olunacaq dünya çempionatında mübarizəyə başlayacaq.
Ənənəvi olaraq, ölkə kubokundan sonra ilin ikinci daxili yarışı böyük gözləntilərlə qarşılanır. Bunun səbəbi idmançıların ölkə yarışlarında beynəlxalq arenada da uğur qazanmağa imkan verən səviyyələrini nümayiş etdirmələridir.
Milli federasiyanın prezidenti Rauf Bünyatəliyev də bunu vurğulayıb.
“Ölkə kuboku və ya çempionatında ilk üçlükdə yer alan istənilən idmançı xaricdə də ilk sıralarda olacaq. Beynəlxalq federasiyanın prezidenti Rafael Santoxa belə idmançılarımızın səviyyəsini yüksək qiymətləndirir. Bu, çox böyük dəyərə malikdir. Bizim vəzifəmiz bu keyfiyyət göstəricisini qorumaq və nailiyyətlərimizi artırmaqdır”, - deyə Bünyatəliyev bildirib.
O əlavə edib ki, bodibildinq üzrə Avropa və dünya arenasında Azərbaycan əsas rəqiblərdən biri hesab olunur.
“Rəqiblərimiz üçün komandamız keyfiyyət göstəricisidir, idmançılarımızdan çəkinirlər. Bu, həm böyük nailiyyətdir, həm də ölkə bayrağı altında səhnəyə çıxan idmançılarımız üçün əlavə stimul və dəstəkdir”, - deyə R.Bünyatəliyev vurğulayıb.
Qarşıdakı ölkə çempionatında klassik bodibildinq, Men’s Physique (çimərlik bodibildinqi), bədən fitnesi və digər əsas növlər üzrə medallar uğrunda mübarizə aparılacaq. Yarışda yeniyetmə və gənc idmançılar da səhnəyə çıxacaq, həmçinin mütləq kateqoriyalar üzrə titullar uğrunda mübarizə keçiriləcək.
Daha sonra milli komanda dünya çempionatında medallar uğrunda mübarizə aparmaq üçün İspaniyaya yollanacaq.
Ötən il dünya çempionatı Səudiyyə Ərəbistanının Əl-Xobar şəhərində keçirilib. Azərbaycan komandası həmin yarışda dörd qızıl, bir gümüş və bir bürünc medal qazanıb.
