Azərbaycanda real aykido üzrə bacarıqları ilə heyranlıq yaradan qızların sayı getdikcə artır. Bununla belə, bu idman növü üzrə qadın məşqçilərə o qədər də tez-tez rast gəlinmir.
Onlardan biri də 2-ci dan qara kəmər sahibi, beynəlxalq seminarlarda Azərbaycanı dəfələrlə layiqincə təmsil etmiş Mətanət Əliyevadır. O, bu idman növünə təsadüfən, tanışının vasitəsilə gəlib və əvvəllər bu döyüş sənətinin mövcudluğundan belə xəbərsiz olub. Özünümüdafiəni öyrənmək istəyən Əliyeva milli komandanın baş məşqçisi Fariz Abdullayevin məşqlərinə qatılmağa başlayıb.
“Məni xoş atmosfer, şagirdlərə fərdi yanaşma və aydın izahlar cəlb etdi və mən bu idman növü ilə məşğul olmağa davam etmək qərarına gəldim”, - deyə Əliyeva İdman.Biz-ə açıqlamasında bildirib.
Onun sözlərinə görə, o, həmişə yeni səviyyəyə keçmək və real aykido üzrə məşqçilik etməyə başlamaq istəyib, lakin uzun müddət bu arzu ona əlçatmaz görünürdü:
“Ürəyimdə həmişə məşqçi olmaq arzusu var idi, baxmayaraq ki, bu məqsəd əlçatmaz görünürdü. Amma günlərin birində Fariz Abdullayev məni məşqçi təyin etdi. Sevincimin həddi-hüdudu yox idi, bunu heç gözləmirdim”.
Mətanət Əliyeva Azərbaycanda qadınların real aykidoya böyük maraq göstərdiyini bildirir. Əsas kontingenti 10-30 yaş aralığında olan qızlar və gənc qadınlar təşkil edir.
Mütəxəssisin sözlərinə görə, onların əsas motivasiyası özünümüdafiəni öyrənməkdir. Halbuki bu idman növü onlara daha çox şey qazandırır:
“Real aykido ilə məşğul olduqda fiziki forma və bədən quruluşu yaxşılaşır. Bizim idman növümüz tarazlığı və hərəkətlərin koordinasiyasını öyrədir, həmçinin çevikliyin inkişafına kömək edir. Biz düzgün yıxılmağı da öyrənirik. Belə bacarıqlar gündəlik həyatda da kömək edir”.
Əliyeva xəbərdarlıq edir ki, qızlar istənilən yerdə, xüsusilə də yaxınları yanında olmadıqda təhlükə ilə üzləşə bilərlər. Buna görə də özünümüdafiə bacarıqlarının əhəmiyyətini kiçiltmək olmaz:
“Qızlar məktəbdə, küçədə aqressiya ilə üzləşə bilərlər. Bu, yalnız oğlanlar tərəfindən deyil, digər qızlar tərəfindən də ola bilər. Özünümüdafiə bacarıqları hər zaman işə yaraya bilər. Valideynlər yadda saxlamalıdırlar ki, onlar həmişə uşaqlarının yanında ola bilmirlər. Bundan başqa, qızın yanında xalası və ya nənəsi də ola bilər və o, yalnız özünü deyil, onları da qoruya bilər. Çoxları deyir ki, qaçmaq ən yaxşı üsuldur, amma bunu hər zaman etmək mümkün olmur. Buna görə də ailələr uşaqların real aykido ilə məşğul olmaq istəyini dəstəkləməlidirlər”.
Bundan əlavə, Mətanət Əliyevanın sözlərinə görə, bu idman növünün bacarıqları daha iri cüssəli rəqibdən belə müdafiə olunmağa imkan verir.
“17 yaşlı şagirdimiz bıçaqlı kişinin hücumuna məruz qaldı və özünü müdafiə edə bildi. Şükürlər olsun ki, o, salamatdır və sağlamdır”, - deyə o danışıb.
Bununla yanaşı, mütəxəssis vurğulayır ki, real aykido sadəcə fiziki hazırlıq deyil. Bu, insana özünün daha yaxşı versiyasına çevrilməyə kömək edən fəlsəfədir:
“Real aykido mənə çox yaxşı təsir edib. Məşqlər zamanı insan həm fiziki, həm də mənəvi cəhətdən inkişaf edir, intizamı və komanda ruhunu öyrənir. Bu idman növü sayəsində özümün yaxşı və pis tərəflərini görməyə başladım.
Real aykido sayəsində mənimsədiyim əsas dərs səbirli olmaq və öz yolunu davam etdirməkdir. Bu gün, bu çılğın həyatda həmin prinsip mənə çox kömək edir”.
