UFC-də çıxış edən çilili döyüşçü İqnasio Bahamondes ardıcıl iki məğlubiyyətdən sonra çəki dərəcəsini dəyişmək qərarına gəlib.
İdman.Biz xəbər verir ki, 29 yaşlı idmançı yüngül çəkidən yarımorta çəki dərəcəsinə keçib. Onun yeni çəkidə debütü sentyabrın 12-də Feniksdə keçiriləcək UFC turnirində baş tutacaq. Çililinin rəqibi bu döyüşdə müsəlman Salixov olacaq.
Bahamondes son iki döyüşünü Azərbaycanın təmsilçilərinə qarşı keçirib. O, 2025-ci ilin iyununda UFC-nin Bakıda keçirilən ilk turnirində Rafael Fizievə hakimlərin yekdil qərarı ilə məğlub olub. 2026-cı ilin martında isə çilili döyüşçü Tofiq Musayevə qarşı keçirdiyi görüşdə də hakimlərin qərarı ilə uduzub.
Bahamondes özü çəki dərəcəsini dəyişmək qərarını son döyüşündən sonra verdiyini etiraf edib. Onun sözlərinə görə, o, həmişə yüngül çəki üçün iri döyüşçü olub və 70,3 kiloqramlıq çəki limitinə düşmək onun üçün çətin olub.
Musayevlə döyüşə hazırlıq xüsusilə ağır keçib. Belə ki, Bahamondes bu görüşü turnirə cəmi üç həftə qalmış qəbul edib. Ağır çəki salma prosesindən sonra döyüşçü və komandası bundan sonra yarımorta çəkidə çıxış etməyin daha doğru qərar olduğu qənaətinə gəlib.
Beləliklə, Tofiq Musayevlə görüş Bahamondes üçün UFC-nin yüngül çəki dərəcəsində keçirdiyi son döyüş olub.
