“Formula-1” üzrə Azərbaycan Qran-prisində “Mercedes” komandasının britaniyalı pilotu Corc Rassell qələbəni son dövrələrdə “Red Bull”un niderlandlı sürücüsü Maks Ferstappenin ciddi təzyiqi altında qoruyub.
İdman.Biz “RacingNews”a istinadən xəbər verir ki, “Mercedes”in komanda rəhbərinin müavini Bredli Lord Ferstappenin yarışın sonundakı hücumlarını “suda qan qoxusu alan köpəkbalığı”na bənzədib.
Rassell Bakı Şəhər Halqasında rahat şəkildə liderlik etsə də, iki təhlükəsizlik avtomobili periodu onun qazandığı üstünlüyü aradan qaldırıb. Yarış bərpa edildikdən sonra Ferstappen britaniyalı pilota yaxınlaşıb və finiş xəttini ondan cəmi 0,2 saniyədən az fərqlə keçib.
Lord bildirib ki, yarış əvvəlcə komandanın ən nikbin strateji planına uyğun gedib:
“Corc önə çıxaraq fərqi artırdı və hər şeyə tam nəzarət edirdi. Restartdan sonra isə Maks fürsəti hiss etdi. Bu, suda qan qoxusu alan köpəkbalığına bənzəyirdi. Corc orta sektorda hər dəfə təxminən yarım saniyə qazanırdı, amma düzlüklərdə slipstrim Maksı yenidən ona yaxınlaşdırırdı. Corc böyük təzyiq altında idi. Bir səhv qələbənin itirilməsi demək olardı, amma o, heç bir səhvə yol vermədi”.
Son dövrədə Valtteri Bottasın 15-ci döngədə qəza etməsi vəziyyəti daha da gərginləşdirib. Bundan əlavə, Rassell bolidində əlavə güc itkisi yaşadığını bildirib. Buna baxmayaraq, britaniyalı pilot üstünlüyünü qoruyaraq karyerasında səkkizinci Qran-pri qələbəsini qazanıb.
