Bu gün, oktyabrın 15-də UEFA Konfrans Liqasının 2026/27 mövsümünün liqa mərhələsinə start veriləcək.
İlk turun proqramında 18 qarşılaşma var. “Ayaks” Splitə yollanacaq, “Monako” əvvəlki səfərlərində uğursuzluq yaşadığı Sofiyada meydana çıxacaq, “Atalanta” və “Brayton” isə mübarizəyə doğma meydanlarında başlayacaqlar. Favoritlər ilk oyundan iddialarını ortaya qoymağa, rəqibləri isə onların heyət problemlərindən və mümkün rotasiyadan yararlanmağa çalışacaqlar.
İdman.Biz xəbər verir ki, ilk turun 10 qarşılaşması Bakı vaxtı ilə saat 20:45-də, digər səkkiz oyun isə saat 23:00-da başlayacaq.
Erkən saatlarda keçiriləcək oyunlar arasında ən çox diqqət çəkən qarşılaşma “Hayduk” - “Ayaks” duelidir. Komandalar sonuncu dəfə 1994/95 mövsümündə Çempionlar Liqasının 1/4 finalında üz-üzə gəliblər. Splitdəki qolsuz heç-heçədən sonra Amsterdam təmsilçisi evdə 3:0 hesabı ilə qalib gəlib və daha sonra turnirin qalibi olub.
İndi “Ayaks”ın qarşısında yeni tarixi hədəf var: “Çelsi”dən sonra UEFA-nın hazırda keçirilən üç əsas klub turnirinin hər birində kubok qazanan ikinci komanda olmaq. Hücum xəttinin hazırkı forması Amsterdam klubuna nikbinlik verir. “Ayaks” son üç səfər matçının hər birində azı dörd qol vurub. Bununla belə, qonaqlar “Polyud” stadionunda meydan sahiblərinin ilk dəqiqələrdən göstərəcəyi təzyiqə tab gətirməli olacaqlar. Hücumdakı üstünlüyü oyuna nəzarətə çevirmək “Ayaks” üçün əsas vəzifələrdən biri olacaq.
“Monako” üçün Sofiya səfəri xüsusi əhəmiyyət daşıyır. Komanda ÇSKA ilə əvvəlki iki səfər qarşılaşmasının hər ikisində məğlub olub: 1982-ci ildə 0:2, 1984-cü ildə isə 1:2 hesabı ilə. Futbolçuların səviyyəsinə görə monakolular üstün görünsələr də, heyətlə bağlı suallar qalır. İngiltərəli müdafiəçi Erik Dayer bud əzələsindəki problemə görə oyunu buraxacaq, İsveçrə millisinin yarımmüdafiəçisi Deni Zakariyanın iştirakı isə fiziki durumundan asılı olacaq.
Baş məşqçi Filipe Luis komandasının turnirin əsas favoritlərindən biri sayılması ilə razılaşmayıb: “Düşünmürəm ki, bizi turnirin favoritləri sırasına daxil etmək olar”. Onun ehtiyatlı yanaşması anlaşılandır. Sofiyada “Monako”nu həm yüksək oyun tempi, həm də tribunalardakı atmosfer baxımından çətin sınaq gözləyir.
Doğma meydanda oynayacaq komandalar arasında ən aşkar favoritlərdən biri “Kauno Jalgiris”i qəbul edəcək “Brayton”dur. Bununla belə, İngiltərə klubunun baş məşqçisi Fabian Hürtseler heyətdə dəyişikliklər olacağını əvvəlcədən açıqlayıb: “Heyətdə mütləq dəyişikliklər olacaq”. Paskal Ströyk meydana çıxmayacaq, Cek Hinşelvud isə heyətə qayıda bilər.
Litva klubu tarixində ilk dəfə avrokubokların əsas mərhələsində iştirak edir və İngiltərəyə ölkə kubokunu qazandıqdan sonra yollanıb. Əsas sual rotasiyadan sonra “Brayton”un adət etdiyi oyun sürətini və futbolçular arasındakı qarşılıqlı anlaşmanı qoruyub-qoruya bilməyəcəyidir. İlk dəqiqələr debütantın özünəinam qazanmasına təsir göstərə bilər.
“Atalanta”nın “Pafos”la oyunu öncəsi müdafiədəki problemlər daha ciddi görünür. Corco Skalvini, İsak Hien və Odilon Kossunu iştirak ərizəsinə daxil edilməyiblər. Raul Bellanova da qarşılaşmanı buraxacaq. Mauritsio Sarrinin komandası favorit sayılsa da, müdafiə xəttindəki itkilər onun zəif nöqtəsinə çevrilə bilər.
Üstəlik, “Pafos” daha yüksək səviyyəli rəqabətlə artıq tanışdır. Kipr təmsilçisi ötən mövsüm Çempionlar Liqasının liqa mərhələsində doqquz xal toplayıb. Buna görə də rəqibi lazımınca qiymətləndirməmək “Atalanta” üçün baha başa gələ bilər.
Axşamın ən gərgin və bərabər mübarizə vəd edən görüşlərindən biri “Kopenhagen” – “Braqa” qarşılaşmasıdır. Meydan sahibləri “Midtyullann”a məğlubiyyətdən sonra azarkeşlərini sevindirməyə çalışacaqlar. Danimarka klubunun baş məşqçisi Bo Svenssonun fikrincə, portuqaliyalıların əsas üstünlükləri topa nəzarət etmək və rəqibə qol imkanlarını minimuma endirmək bacarığıdır.
Danimarkalı hücumçu Yonas Vindin mümkün iştirakı da görüşə əlavə maraq qatır. “Kopenhagen”in yetirməsi bu dəfə “Parken” stadionuna Portuqaliya klubunun futbolçusu kimi qayıdır. Qarşılaşmada oyun tempinə nəzarət həlledici ola bilər. Meydan sahibləri nə vaxt pressinq tətbiq etməli, nə vaxt isə müdafiədə kompaktlığı qorumalı olduqlarını düzgün müəyyənləşdirməlidirlər.
“Trabzonspor” turnirə Finlandiyanın KuPS klubu ilə Tampere şəhərində keçiriləcək oyunla başlayacaq. “Tammela” stadionunda anşlaq gözlənilir. Türkiyə təmsilçisi heyət və oyun səviyyəsinə görə favorit sayılsa da, Finlandiya klubu pley-offa yüksəlmək hədəfini açıq şəkildə bəyan edib.
“Trabzonspor” üçün səbirli oyun xüsusi əhəmiyyət daşıyacaq. Üstünlüyünü tez bir zamanda sübut etmək istəyi müdafiədə boşluqlar yarada və rəqibə əks-hücum imkanları verə bilər.
Digər görüşlər arasında “Xetafe”nin bu yaxınlarda Rumıniyada beşinci çempionluğunu qazanan “Universitatya”ya səfəri diqqət çəkir. Helsinqborqda keçiriləcək “Myelbyu” – “İnter Eskaldes” qarşılaşması isə nəticəsindən asılı olmayaraq tarixə düşəcək. Andorra klubu ölkəsini UEFA-nın kişilər arasında təşkil etdiyi avrokubokların liqa mərhələsində təmsil edən ilk komanda olacaq.
Oyunların proqramında dəyişiklik də edilib. “Eqnatiya” – “Midtyullann” qarşılaşması Albaniyanın paytaxtı Tiranada keçirilən nümayişlərə görə Elbasana köçürülüb. Oyunun başlama saatı dəyişməyib və qarşılaşma azarkeşlərin iştirakı ilə keçiriləcək.
Konfrans Liqası: oktyabrın 15-də keçiriləcək oyunlar və başlama saatları (Bakı vaxtı ilə)
“Luqano” – “Srvena Zvezda” (Luqano şəhəri) – 20:45
“Hayduk” – “Ayaks” (Split) – 20:45
“Gent” – “Orhus” (Gent) – 20:45
“Eqnatiya” – “Midtyullann” (Elbasan) – 20:45
KuPS – “Trabzonspor” (Tampere) – 20:45
“Myelbyu” – “İnter Eskaldes” (Helsinqborq) – 20:45
“Panatinaikos” – “Borats” (Afina) – 20:45
ÇSKA Sofiya – “Monako” (Sofiya) – 20:45
“Riqa” – “Kayrat” (Riqa) – 20:45
“Universitatya” – “Xetafe” (Krayova) – 20:45
“Atalanta” – “Pafos” (Berqamo) – 23:00
“Brayton” – “Kauno Jalgiris” (Brayton) – 23:00
“Kopenhagen” – “Braqa” (Kopenhagen) – 23:00
“Tvente” – “Tun” (Ensxede) – 23:00
“Harts” – “Nordsyelland” (Edinburq) – 23:00
“Sent-Trüiden” – “İberiya” (Sent-Trüiden) – 23:00
“Frayburq” – “Yablonets” (Frayburq) – 23:00
“Brann” – “Linkoln Red İmps” (Berqen) – 23:00
