UEFA Çempionlar Liqasının əsas mərhələsi yalnız Avropanın ən güclü klublarını deyil, eyni zamanda dünyanın müxtəlif bölgələrindən olan futbolçuları da bir araya gətirir. Yeni mövsümün iştirakçıları arasında Bakı “Sabah”ı xüsusilə seçilir. Belə ki, komandanın heyətində qitənin əsas klub turnirində nadir hallarda təmsil olunan bir neçə ölkə və ərazi yer alıb.
İdman.Biz-in araşdırmasına görə, 2026/27 mövsümündə Çempionlar Liqasının 36 iştirakçısının rəsmi sifariş ərizələrinin təhlili “Sabah”ın heyətində turnir üçün “ekzotik” hesab olunan futbol assosiasiyaları ilə bağlı yeddi futbolçunun olduğunu göstərib.
Bu şərti anlayış altında UEFA-ya daxil olmayan, hazırkı Çempionlar Liqasında iki və ya daha az futbolçu ilə təmsil olunan və aparıcı Avropa çempionatlarında çoxsaylı oyunçuları olmayan ölkə və ərazilər nəzərdə tutulur.
Söhbət Stiv Solbedən (Qvadelupa), Aden Makkartidən (Cənubi Afrika), Umarali Rahmonaliyevdən (Özbəkistan), Kahim Parrisdən (Yamayka), Yoy-Lans Mikkelsdən (Ruanda), Ksander Severinadan (Kürasao) və Orfe Mbina (Qabon) gedir. Məsələn, hazırkı Çempionlar Liqasında Özbəkistanın ikinci təmsilçisi “Mançester Siti”nin futbolçusu Abdukodir Xusanovdur.
Bununla belə, futbolçunun mənşəyi hər zaman onun vətəndaşlığı ilə üst-üstə düşmür. Məsələn, Mikkels Almaniya vətəndaşıdır, lakin Ruanda köklərinə malikdir. Buna görə də araşdırma zamanı yalnız futbolçunun pasportu deyil, onun futbol mənsubiyyəti əsas götürülüb.
“Sabah”a ən yaxın nəticəni göstərən klubların hər birinin heyətində bu meyara uyğun 3 futbolçu var. Afinanın AEK klubunda Honduras təmsilçisi Kervin Arriaqa, Mavritaniyadan Abubakari Koita və anqolalı Zini çıxış edir.
“Lill”in heyətində Paraqvaylı Orlando Gill, İndoneziyanı təmsil edən Kalvin Verdonk və Konqo Demokratik Respublikasından Nqalayel Mukau yer alır.
Donetsk “Şaxtyor”unda isə Tunis, Venesuela və Burkina-Fasonu təmsil edən Aley Qram, Qleyker Mendoza və Lassina Traore çıxış edir.
LASK, “Qalatasaray”, “Slovan” və “Vikinq” klublarının hər birində belə iki futbolçu var.
Avstriya klubunda Liviya ilə bağlı Daniel Elfadli və Surinam təmsilçisi Melayro Boqarde çıxış edir. “Qalatasaray”da Qvineya-Bisaudan Renato Nyaga və qabonlu Mario Lemina yer alıb. Norveçin “Vikinq” klubunda isə Yeni Zelandiyanın iki futbolçusu – Co Bell və Canni Stensness çıxış edir.
“Slovan” isə ayrıca diqqət çəkir. Meyar üç və ya daha az futbolçu ilə təmsil olunan assosiasiyalara qədər genişləndirildikdə, Bratislava klubu bu göstəricidə “Sabah”a çatır. Klubun heyətində Panamanın iki, Qambiyanın iki təmsilçisi, həmçinin Qvineya, Anqola və Qanadan olan futbolçular var.
Çempionlar Liqası üçün qeyri-adi coğrafiyanı təmsil edən futbolçular Avropanın nəhəng klublarında da var. “Mançester Siti”də özbəkistanlı Abdukodir Xusanov, Dortmund “Borussiya”sında qvineyalı Seru Girassi, “Barselona”da isə misirli Həmzə Abdelkərim çıxış edir. PSV-nin heyətində Kürasao təmsilçisi Armando Obispo yer alıb. “Portu” və “Betis”in də Dominikan Respublikası ilə bağlı futbolçuları var.
Qeyd edək ki, “Sabah” bu gün “Mançester Yunayted”lə oyunla Çempionlar Liqasının liqa mərhələsində debüt edəcək. Qarşılaşma “Old Trafford” stadionunda keçiriləcək və Bakı vaxtı ilə saat 23:00-da başlayacaq.
Bakı klubunun digər rəqibləri isə bunlardır:
“Slaviya” – 13 oktyabr, Bakı
“Borussiya” Dortmund – 20 oktyabr, Bakı
“Vikinq” – 4 noyabr, Stavanger
“Barselona” – 25 noyabr, Bakı
“Vilyarreal” – 8 dekabr, Vilyarreal
“Napoli” – 20 yanvar, Bakı
“Arsenal” – 27 yanvar, London
