Qətərin ikinci liqasında çıxış edən “Əl-Xaraitiyat” klubunun tanınmış fransalı müdafiəçisi Presnel Kimpembe komandasının Qəbələdə gerçəkləşən təlim-məşq toplanışı barədə təəssüratını bölüşüb.
İdman.Biz xəbər verir ki, “Qəbələ” komandasının mətbuat xidmətinə müsahibə verən təcrübəli oyunçu məşq prosesinin uğurla davam etdiyini bildirib.
“Hazırda təlim-məşq toplanışını keçirik və məşq meydançalarının durumu həqiqətən çox yaxşıdır. Mən daha öncə burada olmamışdım, Qəbələyə ilk gəlişimdir” - deyə P. Kimpembe qeyd edib.
Otuz yaşlı müdafiəçi Qəbələdə onlar üçün yaradılmış yüksəksəviyyəli şəraitdən məmnun qaldığını xüsusi vurğulayıb. Futbolçunun sözlərinə görə, mövcud olan bütün infrastruktur komandanın problemsiz və rahat şəkildə hazırlaşması üçün tam əlverişlidir.
“Burada hər şey bir-birinə olduqca yaxın məsafədə yerləşir. Hoteldən çıxıb məşq meydançasına çatmağımız cəmi bir dəqiqə vaxtımızı alır. Məhz bu amil bizə tam rahatlıqla hazırlaşmağa və bütün diqqətimizi yalnız məşqlərə cəmləməyə şərait yaradır. Meydançaların vəziyyəti isə mükəmməldir. İnanıram ki, biz komanda şəklində burada uğurlu işlərə imza atacağıq”, - deyə fransalı idmançı bildirib.
Qeyd edək ki, Kimpembe PSJ-nin heyətində Çempionlar Liqasının qalibi olub. Bundan əlavə, futbolçu 8 qat Liqa 1 çempionu, 6 dəfə Fransa Kubokunun və Superkubokunun qalibidir. O, həmçinin Fransa millisinin heyətində 2018-ci ildə dünya çempionu adına yiyələnib.
