“Ayxan Abbasovu yaxşı tanıyıram. O, bütün futbolçuları izləyir”.
Bunu Qırğızıstanın “Ozgon” klubunda çıxış edən azərbaycanlı futbolçu Orxan Əliyev sport24.az-a müsahibəsi zamanı deyib.
Həmin müsahibəni təqdim edirik:
- Klubda işləriniz necə gedir?
- Qırğızıstanda mövsüm başa çatıb. Çempionat artıq qurtarıb. Hazırda Bakıdayam. İstirahət edirəm.
- Yayda bu komandaya keçdiniz. Öz çıxışınızı necə dəyərləndirirsiniz?
- Məncə, yaxşıdır. Doqquz matçda yeddi qol vurmuşam. Bir də məhsuldar ötürməm var. Amma düşünürəm ki, daha da yaxşı ola bilərdi.
- Qırğızıstanın “Abdış-Ata” klubu azərbaycanlı futbolçular - İlkin Muradov və Mirabdulla Abbasovla yollarını ayırıb. Onlarla danışmısınızmı?
- Xeyr. Bu barədə onlarla söhbətim olmayıb.
- Sizdə durum necədir? Klubla yeni müqavilə imzalayacaqsınız?
- Mənə yeni sözləşmə təklif ediblər. Hazırda istirahətdəyəm. Yaxın zamanda qərar verəcəyəm.
- 9 oyunda 7 qol və 1 məhsuldar ötürmə pis deyil. Sizcə, niyə milli komandaya dəvət almadınız?
- Mənim çıxış etdiyim liqaya o qədər də önəm vermirlər. Amma buna baxmayaraq öz işimizə davam etməliyik.
- Ayxan Abbasov baş məşqçi təyin ediləndə təklif gözləyirdinizmi?
- Ayxan Abbasovu yaxşı tanıyıram. Gözləyək… Hər şeyi zaman göstərəcək. Bəlkə də dəvət olacaq. Çağırmasa da, öz işimi görəcəyəm.
- Sizcə, Azərbaycan Premyer Liqasında oynasaydınız, dəvət alardınız?
- Ola bilərdi. Çünki Ayxan müəllim bütün futbolçuları izləyir.
- Çıxış etdiyiniz çempionatın səviyyəsi necədir?
- Pis deyil. İnkişaf gedir, stadionlar tikilir. Keyfiyyətli futbolçular da var.
