Azərbaycanın “Vüqar Həşimov” şahmat klubu Monteneqronun Budva şəhərində keçirilən klublararası Avropa Kubokunda liderliyə yüksəlib.
İdman.Biz Avropa Şahmat İttifaqına (ECU) və yarışın rəsmi protokollarına istinadən xəbər verir ki, təmsilçimiz ikinci turda Belçikanın SDP Wachtebeke klubunu 6:0 hesabı ilə məğlub edib.
Bu, “Vüqar Həşimov”un turnirdə ardıcıl ikinci maksimal nəticəsi olub.
Xatırladaq ki, oktyabrın 17-də keçirilən ilk turda Azərbaycan şahmatçıları Niderlandın “Woerden” komandasına da 6:0 hesabı ilə qalib gəliblər.
Beləliklə, iki tur ərzində keçirdiyi 12 partiyanın hamısını qazanan “Vüqar Həşimov” dörd komanda xalı və fərdi lövhələrdə mümkün olan maksimal 12 xal toplayıb.
Oktyabrın 18-də yenilənən rəsmi turnir cədvəlinə əsasən, bu nəticə Azərbaycan klubunun 108 komanda arasında birinci pilləyə yüksəlməsini təmin edib.
İkinci yerdə Macarıstanın “Tuxera Aquaprofit Nagykanizsai”, üçüncü pillədə isə Şimali Makedoniyanın “Alkaloid” klubu qərarlaşıb.
Maraqlıdır ki, hər üç komandanın əsas göstəriciləri eynidir: iki qələbə, dörd komanda xalı və fərdi lövhələrdə 12 xal. Onların turnir cədvəlindəki sıralaması əlavə əmsallarla müəyyənləşir.
“Vüqar Həşimov”un heyətində Aydın Süleymanlı, Read Səmədov, Xəzər Babazadə, Şiroğlan Talıbov, Vüqar Manafov və Kənan Qarayev çıxış edirlər.
Avropa Kubokunun builki yarışında iştirakçı sayına görə rekord qeydə alınıb. Turnirə ümumilikdə 130 klub qatılıb. Onlardan 108-i açıq yarışda mübarizə aparır.
Kubokun əsas favoritləri arasında Türkiyənin “Bayegan Pendik”, titulun hazırkı sahibi Rumıniyanın “SuperChess”, Şimali Makedoniyanın “Alkaloid” və Çexiyanın “Novy Bor” klubları yer alır.
Yarış İsveçrə sistemi üzrə keçirilir və yeddi turdan ibarətdir. Qalib oktyabrın 23-də müəyyənləşəcək.
Budvadakı turniri əhəmiyyətli edən digər məqam yeni yaradılan Avropa Şahmat Superliqasına vəsiqə qazanmaq imkanıdır.
ECU-nun reqlamentinə əsasən, açıq Avropa Kubokunda ilk dörd yeri tutan klub 2027-ci ilin fevralında keçirilməsi planlaşdırılan Superliqanın ilk mövsümündə birbaşa iştirak hüququ əldə edəcək.
Daha bir vəsiqə isə ilk dördlükdən kənarda qalan komandalar arasında ən yüksək reytinqə malik kluba veriləcək.
Beləliklə, 12:0 ümumi nəticəsi ilə qazanılan iki böyükhesablı qələbə və iki turdan sonra liderlik “Vüqar Həşimov”un həm Avropa Kubokunun medalları, həm də yeni beynəlxalq turnirə vəsiqə uğrunda mübarizəsinə əlverişli zəmin yaradır.
