Yunanıstanın Rodos adasında klublar arasında keçirilən şahmat üzrə Avropa Kubokuna yekun vurulub.
İdman.Biz xəbər verir ki, yarışda Azərbaycanı təmsil edən “Vüqar Həşimov” klubu turniri ilk “onluq”da başa vurub.
Son – yeddinci turda Rauf Məmmədov, Aydın Süleymanlı, Əhməd Əhmədzadə, Reyid Səmədov, Vüqar Manafov, Xəzər Babazadə və Qazaxıstan şahmatçısı Noqerbek Qazıbəkdən ibarət komanda Çexiyanın “Novi Bor” klubuna 1,5:4,5 hesabı ilə uduzub. Turnirin yekununda “Vüqar Həşimov” komandası 10 xal toplayaraq 8-ci yeri tutub.
Heyətində azərbaycanlı şahmatçılar Şəhriyar Məmmədyarov və Xaqan Əhmədin yer aldığı Türkiyə klubları “Beyegan Pendik” və “Turkish Airlines” müvafiq olaraq 4-cü və 9-cu yerləri bölüşüblər.
Qadınlar arasında Serbiyanın “Sirmium Sremska Mitrovitsa” komandası (Gövhar Beydullayeva ilə) 2-ci, Rumıniyanın “SuperChess” klubu (Ülviyyə Fətəliyeva ilə) isə 4-cü olub.
Qeyd edək ki, Avropa Kuboku isveçrə sistemi üzrə keçirilib.
