Oktyabrın 20-də Milli Basketbol Assosiasiyasında (NBA) 2026/27 mövsümünə start veriləcək. Bu, dünyanın ən güclü basketbol liqasının tarixində 81-ci mövsüm olacaq.
İdman.Biz xəbər verir ki, çempionatda 30 klub pley-offa vəsiqə və çempionluq uğrunda mübarizə aparacaq. Mövsümün əsas intriqalarından biri son çempion “Nyu-York Niks”in titulunu qoruyub-qoruya bilməyəcəyi olacaq.
NBA çempionatı necə təşkil olunur?
NBA-da 30 komanda Şərq və Qərb konfranslarına bölünüb. Hər konfransda 15 klub mübarizə aparır. Konfransların hər biri beş komandadan ibarət üç diviziona ayrılır. Beləliklə, liqada ümumilikdə altı divizion var.
Müntəzəm çempionatda hər komanda 82 oyun keçirir. Klublar həm öz konfranslarının, həm də digər konfransın təmsilçiləri ilə qarşılaşırlar.
Oyunların təqvimi ənənəvi olaraq belə formalaşır:
16 oyun – komanda öz divizionundakı dörd rəqibin hər biri ilə dörd dəfə qarşılaşır.
24 oyun – öz konfransının digər iki divizionunda yer alan altı komandanın hər biri ilə dörd oyun keçirir.
12 oyun – eyni konfransın digər dörd komandası ilə hərəyə üç dəfə üz-üzə gəlir.
30 oyun – digər konfransın 15 komandasının hər biri ilə iki dəfə, evdə və səfərdə oynayır.
Beləliklə, hər klub müntəzəm çempionatda öz konfransının təmsilçilərinə qarşı 52, digər konfransın komandalarına qarşı isə 30 oyun keçirir. Mövsümdaxili NBA Kuboku ilə əlaqədar təqvimdə müəyyən dəyişikliklər ola bilər.
Futboldan fərqli olaraq, NBA-da komandalar qələbələrinə görə xal toplamırlar. Turnir cədvəli qələbə və məğlubiyyətlərin sayına, eləcə də qələbə faizinə əsasən müəyyənləşir. Rəqibin hansı konfransı və ya divizionu təmsil etməsindən asılı olmayaraq, hər qələbə eyni əhəmiyyət daşıyır.
Çempion necə müəyyənləşir?
Müntəzəm çempionatın yekununda hər konfransın ilk altı pilləsində qərarlaşan komandalar birbaşa pley-offa vəsiqə qazanırlar. Yeddinci–onuncu yerləri tutan klublar isə pley-in turnirində mübarizə apararaq qalan iki vəsiqənin sahibini müəyyənləşdirirlər.
Beləliklə, pley-off mərhələsində hər konfransdan səkkiz komanda olmaqla, ümumilikdə 16 klub iştirak edir.
Pley-offda mübarizə olimpiya sistemi üzrə davam edir: məğlub olan komanda yarışdan kənarlaşır, qalib isə növbəti mərhələyə yüksəlir. Hər konfransda əvvəlcə dörd, sonra iki və nəhayət, bir komanda mübarizəni davam etdirir və konfransın qalibi müəyyənləşir.
Bütün pley-off seriyaları dörd qələbəyədək davam edir. Şərq və Qərb konfranslarının komandaları müntəzəm çempionatda bir-biri ilə qarşılaşsalar da, pley-offda ayrı-ayrılıqda mübarizə aparırlar. Yalnız hər iki konfransın qalibi NBA finalında üz-üzə gəlir və çempionluğun taleyini həll edir.
Yeni mövsümün favoritləri kimlərdir?
Son çempion “Nyu-York Niks” titulunu qorumağı hədəfləyir. Ceylen Branson komandanın əsas liderlərindən biri olaraq qalır və Nyu-York təmsilçisinin uğurunda mühüm rol oynayacaq.
Çempionluğun əsas namizədləri arasında fransalı basketbolçu Viktor Vembanyamanın liderlik etdiyi “San-Antonio Spers” də xüsusi yer tutur. Gənc ulduz artıq NBA-nın ən diqqətçəkən oyunçularından biridir və Texas təmsilçisini zirvəyə daşımağa çalışacaq.
Şey Gildeus-Aleksanderin çıxış etdiyi “Oklahoma-Siti Tander” də çempionluq uğrunda mübarizənin əsas iştirakçılarından biri olmağa iddialıdır.
“Boston Seltiks”, “Denver Naqqets”, “Klivlend Kavalyers” və digər güclü klublar da mövsümün əsas mükafatına sahib çıxmağa çalışacaqlar.
Yeni mövsüm ərəfəsində heyətində ciddi dəyişikliklər edən “Filadelfiya Seventi Siksers” də diqqət mərkəzində olacaq. Komandanın yenilənmiş heyətlə hansı nəticələrə imza atacağı maraq doğurur.
Azarkeşləri daha nələr gözləyir?
Müntəzəm çempionat və pley-offla yanaşı, NBA-da mövsümdaxili NBA Kuboku turniri də keçiriləcək. Bu yarışın bəzi oyunları müntəzəm çempionatın təqviminə daxil edilir.
Fevralda ənənəvi NBA Ulduzlar Oyunu keçiriləcək. Yazda isə komandalar mövsümün ən həlledici mərhələsinə qədəm qoyacaqlar.
Müntəzəm çempionat 2027-ci il aprelin 11-də başa çatacaq, pley-off mərhələsi isə aprelin 17-də başlayacaq. NBA-nın yeni çempionunun adı iyunda bəlli olacaq.
